India vs New Zealand 2nd ODI : कुलदीप यादवची भेदक गोलंदाजी आणि रोहित-धवन यांच्या दमदार फलंदाजीच्या जोरावर दुसऱ्या एकदिवसीय सामन्यात भारताने न्यूझीलंडचा ९० धावांनी पराभव केला. या विजयासह विराटसेनेने भारतीयांना प्रजासत्ताक दिनाची भेट दिली आहे. भारताने दिलेल्या ३२५ धावांचा पाठलाग करताना ४०.२ षटकांत न्यूझीलंडचा संघ २३४ धावांवर गारद झाला. भारताच्या फिरकी गोलंदाजांनी सामन्यात सात बळी घेतले. कुलदीप यादवने चार बळी घेत न्यूझीलंडचे कंबरडे मोडले. चहलने दोन आणि केदार जाधवने एक बळी घेत कुलदीपला चांगली साथ दिली. याशिवाय भुवनेश्वरने दोन आणि शामीने एका फलंदाजाला बाद केले. ३२५ धावांचा पाठलाग करताना न्यूझीलंडला साजेशी सुरुवात करता आली नाही. दबावामध्ये फलंदाज ठरावीक अंतरावर बाद होत गेले. कर्णधार केन विलियम्सनने, रॉस टेलर, टॉम लॅथम, कॉलिन मुन्रो व हेन्री निकोल्स स्पशेल अपयशी ठरले. न्यूझीलंडकडून डग ब्रेसवेलचा अपवाद वगळता एकाही फलंदाजाला साजेशी कामगिरी करता आली नाही. डग ब्रेसवेलने ५७ धावांची खेळी केली. अर्धशतकी खेळी करणाऱ्या रोहित शर्माला सामनावीर पुरस्कार देऊन गौरवण्यात आले. या विजयासह पाच सामन्याच्या मालिकेत भारताने २-० ने आघाडी घेतली आहे. नाणेफेक जिंकून प्रथम फलंदाजी करताना भारताने ४ बाद ३२४ धावा केल्या. सलामीवीर शिखर धवन आणि रोहित शर्मा यांनी आक्रमक सुरुवात केली. दोघांनी अर्धशतक ठोकले. पण त्यानंतर धवन ६६ धावांवर बाद झाला. पाठोपाठ रोहित शर्मा ८७ धावांवर बाद झाला. विराट कोहलीने ४३ तर रायडूने ४७ धाव करत धावसंख्येत भर घातली. पण हे दोघेही बाद झाले. अखेर शेवटच्या काही षटकात धोनी (४८) आणि केदार जाधव (२२) यांनी फटकेबाजी करत भारताची धावसंख्या तीनशेपार नेली. न्यूझीलंडकडून बोल्ट आणि फर्ग्युसनने २-२ बळी टिपले.