विराट कोहलीच्या नेतृत्वाखाली टीम इंडियाला न्यूझीलंड दौऱ्यात दुसऱ्या व्हाईटवॉशला सामोरं जावं लागलं आहे. ख्राईस्टचर्च कसोटी सामन्याच्या तिसऱ्या दिवशी यजमान न्यूझीलंडने विजयासाठी दिलेलं १३२ धावांचं आव्हान ७ गडी राखत पूर्ण केलं. यामुळे वन-डे मालिकेपाठोपाठ कसोटी मालिकेतही भारतीय संघाला पराभवाचं तोंड पहावं लागलं आहे. कसोटी अजिंक्यपद स्पर्धेतला भारतीय संघाचा हा पहिला मालिका पराभव ठरला आहे.
भारताचा दुसरा डाव डाव १२४ धावांत गुंडाळल्यानंतर न्यूझीलंडला विजयासाठी १३२ धावांचं आव्हान मिळालं. या आव्हानाचा पाठलाग करताना तिसऱ्या दिवशी पहिल्या सत्रापर्यंत न्यूझीलंडने एकही गडी न गमावता ४६ धावांपर्यंत मजल मारली. उपहाराच्या सत्रानंतरही खेळपट्टीवर जम बसवलेल्या लॅथम आणि ब्लंडल जोडीने भारतीय गोलंदाजांचा समर्थपणे सामना करत धावफलक हलता ठेवला. यादरम्यान लॅथमने आपलं अर्धशतकही साजरं केलं. अखेरीस १०३ धावांवर उमेश यादवने लॅथमला यष्टीरक्षक पंतकरवी झेलबाद केलं. लॅथमने ५२ धावा केल्या. यानंतर जसप्रीत बुमराहने बाऊंसर चेंडू टाकत कर्णधार विल्यमसनला आपल्या जाळ्यात अडकवलं. यानंतर टॉम ब्लंडलने आपलं अर्धशतक झळकावत संघाला विजयाच्या उंबरठ्यावर आणून सोडलं. मात्र ५५ धावांवर खेळत असताना जसप्रीत बुमराहने त्याचा त्रिफळा उडवला. यानंतर अनुभवी रॉस टेलर आणि हेन्री निकोल्स यांनी न्यूझीलंडच्या विजयावर शिक्कामोर्तब केलं. दुसऱ्या डावात भारताकडून बुमराहने २ तर उमेश यादवने १ बळी घेतला.
त्याआधी, दुसऱ्या दिवशी ६ गड्यांच्या मोबदल्यात ९० धावांपर्यंत मजल मारलेल्या भारतीय संघाची तिसऱ्या दिवशीही खराब सुरुवात झाली. हनुमा विहारी टीम साऊदीच्या गोलंदाजीवर वॉटलिंगकडे झेल देऊन माघारी परतला. यानंतर ऋषभ पंत, मोहम्मद शमी हे फलंदाजही एकामागोमाग एक माघारी परतले. रविंद्र जाडेजाने फटकेबाजी करत भारताला शतकी आघाडी मिळवून दिली. ट्रेंट बोल्टच्या गोलंदाजीवर चोरटी धाव घेण्याच्या प्रयत्नात जसप्रीत बुमराह धावबाद झाला आणि भारताचा दुसरा डाव १२४ धावांमध्ये आटोपला. न्यूझीलंडकडून दुसऱ्या डावात ट्रेंट बोल्टने ४, टीम साऊदीने ३ तर डी-ग्रँडहोम आणि वँगर यांनी प्रत्येकी १-१ बळी घेतला.
७ गडी राखत न्यूझीलंडची सामन्यात बाजी, मालिकाही २-० ने जिंकली
कसोटी अजिंक्यप स्पर्धेत भारतीय संघाचा पहिला मालिका पराभव
वन-डे मालिकेपाठोपाठ कसोटी मालिकेतही टीम इंडियाला व्हाईटवॉश
जसप्रीत बुमराहच्या भन्नाट स्विंगवर ब्लंडल त्रिफळाचीत, ५५ धावांची खेळी करत ब्लंडल बाद
उमेश यादवच्या गोलंदाजीवर चौकार खेचत ब्लंडलचं अर्धशतक, भारतीय गोलंदाज पूर्णपणे हतबल
जसप्रीत बुमराहच्या गोलंदाजीवर अजिंक्य रहाणेने घेतला झेल
अर्धशतकवीर टॉम लॅथम माघारी, यष्टीरक्षक ऋषभ पंतने एकहाती घेतला झेल, लॅथमची ५२ धावांची खेळी
संघाने ओलांडला शतकी धावसंख्येचा टप्पा, दोन्ही फलंदाजांकडून भारतीय गोलंदाजांचा संयमाने सामना
ब्लंडल आणि लॅथम यांची महत्वपूर्ण भागीदारी
पहिल्या सत्राअखेरीस न्यूझीलंड बिनबाद ४६, यजमानांची विजयाच्या दिशेने वाटचाल
बोल्टच्या गोलंदाजीवर चोरटी धाव घेण्याच्या प्रयत्नात बुमराह धावचीत
१२४ धावांमध्ये भारताचा दुसरा डाव आटोपला, १३१ धावांची आघाडी
न्यूझीलंडला विजयासाठी १३२ धावांचं आव्हान
टीम साऊदीच्या गोलंदाजीवर ब्लंडलने घेतला झेल
भारतीय संघाचा आठवा गडी माघारी
टीम साऊदीच्या गोलंदाजीवर यष्टीरक्षक वॉटलिंगने घेतला झेल
भारतीय संघाकडे शतकी आघाडी