विराट कोहलीच्या नेतृत्वाखाली भारतीय संघ सध्या वेस्ट इंडिज दौऱ्यावर आहे. शुक्रवारपासून दोन्ही संघ अखेरचा कसोटी सामना खेळण्यासाठी मैदानात येतील. यादरम्यान बीसीसीआयच्या निवड समितीने आगामी दक्षिण आफ्रिकेच्या भारत दौऱ्यासाठी गुरुवारी रात्री संघाची घोषणा केली. टी-२० मालिकेसाठी निवड समितीने भुवनेश्वर कुमारला विश्रांती दिली आहे. याचसोबत विश्वचषकानंतर दोन महिन्यांच्या सुट्टीवर गेलेल्या धोनीलाही संघात जागा मिळालेली नाहीये. "धोनी सध्या अमेरिकेमध्ये आहे, आणि त्याने आफ्रिका दौऱ्यासाठी आपण उपलब्ध नसल्याचं कळवलं होतं. याच कारणासाठी त्याची संघात निवड झालेली नाही." India Today वाहिनीशी बोलत असताना एम.एस.के. प्रसाद यांनी धोनीला संघात जागा न मिळण्याबाबत स्पष्टीकरण दिलं. दरम्यान निवड समितीने हार्दिक पांड्याला आफ्रिका दौऱ्यासाठी संघात जागा दिली आहे. दक्षिण आफ्रिकेविरुद्ध ३ टी-२० सामन्यांच्या मालिकेसाठी असा असेल भारताचा संघ - विराट कोहली (कर्णधार), रोहित शर्मा (उपकर्णधार), लोकेश राहुल, शिखर धवन, श्रेयस अय्यर, मनीष पांडे, ऋषभ पंत (यष्टीरक्षक), हार्दिक पंडय़ा, रवींद्र जडेजा, कृणाल पंडय़ा, वॉशिंग्टन सुंदर, राहुल चहर, खलील अहमद, दीपक चहर, नवदीप सैनी.
