आंतरराष्ट्रीय मास्टर्स कार्तिकेयन मुरली आणि राजेश व्ही. ए. व्ही या भारताच्या बुद्धिबळपटूंना सहाव्या मुंबई महापौर चषक आंतरराष्ट्रीय बुद्धिबळ स्पर्धेत शनिवारी पराभवाचा सामना करावा लागला. पाचव्या फेरीअखेर चार बुद्धिबळपटू साडेचार गुणांसह संयुक्तपणे आघाडीवर आहेत. अर्मेनियाचा ग्रँडमास्टर बाबूजियान लेव्हॉन आणि जॉर्जियाचा ग्रँडमास्टर पान्तसुलैया लिवान यांनी नवव्या चालीतच बरोबरी पत्करली. त्यांच्यासह जॉर्जियाचा अव्वल मानांकित ग्रँडमास्टर मिखाइल माहेदिश्विली आणि अर्मेनियाचा ग्रँडमास्टर पेट्रोसियान डेव्हिट हे चार जण आघाडीवर आहेत. आंतरराष्ट्रीय मास्टर राहुल संगमा आणि विक्रमादित्य कुलकर्णी यांनी आपापले सामने बरोबरीत सोडवले. २१०० रेटिंग गुणांखाली झालेल्या गटात सुप्रिया जोशी, स्नेहल भोसले, चिराग सत्कार, तेजस जोशी, शंतनू भांबुरे आणि विराज ताम्हणकर या मुंबईच्या खेळाडूंसह अन्य सात जण ४ गुणांसह संयुक्तपणे आघाडीवर आहेत.
