News Flash

रोमहर्षक विजयासह बंगळुरूची बाद फेरीकडे वाटचाल

शेवटच्या षटकापर्यंत रंगतदार झालेल्या लढतीत रॉयल चॅलेंजर्स बंगळुरू संघाने चेन्नई सुपर किंग्जवर एक चेंडू व पाच विकेट राखून रोमहर्षक विजय मिळविला.

| May 19, 2014 07:27 am

शेवटच्या षटकापर्यंत रंगतदार झालेल्या लढतीत रॉयल चॅलेंजर्स बंगळुरू संघाने चेन्नई सुपर किंग्जवर एक चेंडू व पाच विकेट राखून रोमहर्षक विजय मिळविला. या विजयामुळे बंगळुरू संघाच्या आयपीएलच्या सातव्या मोसमात बाद फेरी गाठण्याच्या आशा जिवंत ठेवल्या आहेत.
विजयासाठी १३८ धावांचे माफक आव्हान असूनही बंगळुरूला विजयासाठी झगडावे लागले. शेवटच्या महत्त्वपूर्ण षटकांमध्ये त्यांचा भरवशाचा आक्रमक फलंदाज ए बी डी’ व्हिलियर्सने १४ चेंडूंत २८ धावा करताना एक चौकार व तीन षटकार अशी आतषबाजी केली. तोच सामनावीर ठरला. युवराज सिंगने एक षटकारासह नाबाद १३ धावा करताना त्याला चांगली साथ दिली. त्यामुळेच त्यांना विजय साकारता आला. बंगळुरूच्या ख्रिस गेल (तीन चौकार व तीन षटकारांसह ४६) व विराट कोहली (एक चौकार व एक षटकारासह २७) यांनी विजयाचा पाया रचला.
प्रथम फलंदाजी करताना चेन्नईची एक वेळ २ बाद २९ अशी दयनीय स्थिती होती. परंतु सुरेश रैनाने ४८ चेंडूंत ६२ धावा करताना एक षटकार व सहा चौकार अशी फटकेबाजी केली. डेव्हिड हसीने २९ चेंडूंत २५ धावा करताना एक चौकार व एक षटकार अशी टोलेबाजी केली. बंगळुरू संघाकडून वरुण आरोनने २९ धावांमध्ये दोन बळी घेतले. या सामन्यातील विजयासह बंगळुरू संघाने ११ सामन्यांमध्ये १० गुणांची कमाई केली आहे.

संक्षिप्त धावफलक
चेन्नई सुपर किंग्ज : २० षटकांत ४ बाद १३८ (सुरेश रैना ६२, डेव्हिड हसी २५; वरुण आरोन २/२९) पराभूत वि. रॉयल चॅलेंजर्स बंगळुरू : १९.५ षटकांत ५ बाद १४२ (ख्रिस गेल ४६, विराट कोहली २७,  ए बी डी’व्हिलियर्स २८; आर. अश्विन २/१६).
सामनावीर : ए बी डी’व्हिलियर्स.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on May 19, 2014 7:27 am

Web Title: ipl 2014 chennai super kings vs royal challengers bangalore
Next Stories
1 दुबळ्या दिल्लीपुढे अव्वल पंजाबचे पारडे जड
2 बलाढय़ राजस्थानपुढे मुंबई इंडियन्सचे आव्हान
3 बायर्न म्युनिकची जेतेपदावर मोहोर
Just Now!
X