IPL 2019 DC vs SRH Updates : बेअरस्टोची तडाखेबाज खेळी (४८) आणि मोहम्मद नबीची अखेरच्या क्षणातील फटकेबाजी यांच्या जोरावर दिल्लीविरुद्धच्या सामन्यात हैदराबादने ५ गडी राखून विजय मिळवला. दिल्लीने २० षटकात ८ बाद १२९ धावा केल्या होत्या. या आव्हानाचा पाठलाग करताना हैदराबादचा डाव मध्ये थोडा अडखळला, पण अखेर त्यांनी सामना जिंकून विजयी लय कायम राखली. १३० धावांच्या माफक आव्हानाचा पाठलाग करताना हैदराबादने तडाखेबाज सुरुवात केली आणि केवळ ३२ चेंडूत अर्धशतकी सलामी दिली. बेअरस्टोने धमाकेदार सुरुवात केली. पण तडाखेबाज खेळी करणाऱ्या बेअरस्टोला अर्धशतकाने हुलकावणी दिली आणि अखेर हैदराबादला पहिला धक्का बसला. त्याने २८ चेंडूत ४८ धावा केल्या. त्यात ९ चौकार आणि १ षटकार समाविष्ट होता. फटकेबाजीच्या प्रयत्नात डेव्हिड वॉर्नर झेलबाद झाला आणि हैदराबादला दुसरा धक्का बसला. त्याने १८ चेंडूत १० धावा केल्या. बेअरस्टो-वॉर्नर बाद झाल्यावर मनीष पांडे आणि विजय शंकर दोघांनी डाव सावरला. पण उंच फटका खेळण्याच्या प्रयत्नात तो झेलबाद झाला. त्याने १३ चेंडूत १० धावा केल्या. मनीष पांडे बाद झाल्यावर पाठोपाठ विजय शंकरदेखील झेलबाद झाला आणि हैदराबादला चौथा धक्का बसला. विजयने २१ चेंडूत १६ धावा केल्या. दीपक हुडाने फिरकीपटूला षटकार मारण्याचा प्रयत्न केला, पण तो झेलबाद झाला. त्याने ११ चेंडूत १० धावा केल्या. अखेर मोहम्मद नबी आणि युसूफ पठाण यांनी हैदराबादला विजय मिळवून दिला. त्याआधी दिल्लीचा सलामीवीर पृथ्वी शॉ त्रिफळाचीत झाला. वेगवान गोलंदाज भुवनेश्वर कुमारने त्याला माघारी धाडले. शॉ ने ११ चेंडूत २ चौकार लगावत ११ धावा केल्या. भारताचा अनुभवी सलामीवीर शिखर धवन दिल्लीकडून आज खेळताना फार काळ खेळपट्टीवर तग धरू शकला नाही. मोहम्मद नबीच्या गोलंदाजीवर तो स्वीप करण्याच्या प्रयत्नात झेल बाद झाला. त्याने १४ चेंडूत एका चौकारासह १२ धावा केल्या. दिल्लीकरांना चांगल्या कामगिरी अपेक्षा असलेला ऋषभ पंत अवघ्या ५ धावा करून माघारी परतला आणि दिल्लीला तिसरा धक्का बसला. केवळ ७ चेंडू खेळलेला पंत मोठा फटका खेळताना झेलबाद झाला. संघात पुनरागमन झालेला राहुल तेवतीया आपली छाप पाडू शकला नाही. तो देखील ७ चेंडूत ५ धावा करून झेलबाद झाला. संदीप शर्माने त्याला परतीचा मार्ग दाखवला. डावखुरा परदेशी फलंदाज कॉलिन इन्ग्रॅम ८ धावांवर माघारी परतला आणि दिल्लीला पाचवा धक्का बसला. सिद्धार्थ कौलच्या गोलंदाजीवर चौकार लागवण्याच्या प्रयत्नात असताना मनीष पांडेने त्याचा अप्रतिम झेल टिपला. झटपट गडी बाद होत असताना कर्णधार श्रेयस अय्यरने एक बाजू लावून धरली. पण शेवटची ४ षटके शिल्लक असताना फटकेबाजी करण्याच्या प्रयत्नात त्याची झुंज संपुष्टात आली. अय्यरने ४१ चेंडूत ३ चौकार आणि एका षटकाराच्या साहाय्याने ४३ धावा केल्या. १ चौकार आणि १ षटकार लगावणारा ख्रिस मॉरिस लवकर झेलबाद झाला. त्याने १५ चेंडूत १७ धावा केल्या. त्यानंतर चौकार लगावून रबाडा झेलबाद झाला. अखेर अक्षर पटेलने केलेल्या फटकेबाजीच्या (२३*) जोरावर दिल्लीने २० षटकात ८ बाद १२९ धावा केल्या.