आयपीएलच्या बाराव्या हंगामात घरच्या मैदानावर पहिला सामना खेळणाऱ्या मुंबई इंडियन्सने, जम्मू-काश्मीरच्या रसिख सलाम दर या खेळाडूला जागा देऊन सर्वांना आश्चर्याचा धक्का दिला. 17 वर्षीय रसिख हा मुळचा जम्मू-काश्मीरचा खेळाडू आहे. सुरुवातीच्या काही षटकांमध्ये रसिखने आपल्या गोलंदाजीने काहीकाळ शिखर धवनसारख्या फलंदाजाला चांगलंच अडचणीत आणलं होतं. मुंबई इंडियन्सच्या या नवीन खेळाडुबद्दल आज काही अनोख्या गोष्टी आम्ही तुम्हाला सांगणार आहोत. 17 वर्ष आणि 353 दिवस, मुंबई इंडियन्सकडून पदार्पण करणारा रसिख सलाम सर्वात तरुण खेळाडू ठरला आहे. रसिख मुळचा जम्मू-काश्मीरच्या कुलगाम जिल्ह्यातील अश्मुजी गावचा रहिवासी आहे. रसिख हा स्वभावाने लाजाळू आहे. 2018 साली 19 वर्षाखालील कूचबिहार करंडक स्पर्धेदरम्यान रसिख मुंबई इंडियन्सच्या नजरेस आला होता. रसिखने मुंबई इंडियन्सच्या नवी मुंबई येथे झालेल्या दोन ट्रेनिंग कँपला हजेरी लावली होती. बाराव्या हंगामासाठी मुंबई इंडियन्सने रसिखवर 20 लाखांची बोली लावली आहे. रसिखला आयपीएलमधील आपल्या पहिल्या सामन्यात एकही बळी घेता आला नाही.
