मनिष पांडे आणि डेव्हिड वॉर्नरने केलेल्या अर्धशतकी खेळाच्या जोरावर सनराईजर्स हैदराबाद संघाने १७५ धावांपर्यंत मजल मारली. केन विल्यमसनच्या अनुपस्थितीत खेळणाऱ्या हैदराबादने चेन्नईच्या गोलंदाजांचा व्यवस्थित समाचार घेतला. हैदराबादकडून डेव्हिड वॉर्नरने ५७ तर मनिष पांडेने नाबाद ८३ धावा केल्या. या दोन्ही फलंदाजांनी केलेल्या भागीदारीमुळे हैदराबादच्या संघाने आव्हानात्मक धावसंख्येचा टप्पा गाठला.

अवश्य वाचा – देशासाठी धोनीइतकं योगदान कोणत्याही खेळाडूने दिलं नाही – कपिल देव

डेव्हिड वॉर्नर आणि मनिष पांडेची ही जोडी अखेरीस हरभजनने फोडली. वॉर्नरचं अर्धशतक झाल्यानंतर, हरभजनच्या गोलंदाजीवर पुढे येऊन मोठा फटका खेळण्याच्या नादात वॉर्नर फसला….आणि पुढे काही कळण्याच्या आतच धोनीने स्टम्पिंग करुन वॉर्नरला माघारी परतण्याचा रस्ता खुला करुन दिला. धोनीच्या या तेजतर्रार स्टम्पिंगचा व्हिडीओ सध्या व्हायरल होतो आहे.

दरम्यान, चेन्नईविरुद्ध आयपीएलमध्ये सर्वाधिक अर्धशतकी खेळी करणाऱ्या फलंदाजांच्या यादीत वॉर्नरने स्थान मिळवलं आहे. शिखर धवन, रोहित शर्मा आणि विराट कोहली या तिन्ही फलंदाजांनी चेन्नईविरुद्ध ६ वेळा अर्धशतकी खेळी केली आहे. याचसोबत सातत्याने अर्धशतकी खेळी करणाऱ्या फलंदाजांच्या यादीत वॉर्नरने विरेंद्र सेहवाग आणि जोस बटलरशी बरोबरी केली आहे. बाराव्या हंगामात वॉर्नरने सलग ५ वेळा अर्धशतकं झळकावली आहेत.