IPL 2019 RR vs DC Updates : ऋषभ पंतची (७८) दणकेबाज नाबाद खेळी आणि शिखर धवनचे (५४) अर्धशतक यांच्या बळावर दिल्लीने राजस्थानला ६ गडी राखून पराभूत केले. सलामीवीर अजिंक्य रहाणेच्या नाबाद १०५ धावा आणि कर्णधार स्मिथचे दमदार अर्धशतक याच्या जोरावर राजस्थानने २० षटकात ६ बाद १९१ धावा ठोकल्या आणि दिल्लीला १९२ धावांचे आव्हान दिले होते. पण पंतच्या फटकेबाजीने दिल्लीला ४ चेंडू राखून विजय मिळवून दिला. १९२ धावांच्या आव्हानाचा पाठलाग करताना दिल्लीने चांगली सुरुवात करत सहाव्या षटकात अर्धशतकी सलामी दिली. चांगल्या लयीत असलेल्या शिखर धवनने देखील दमदार अर्धशतक ठोकले. पण त्यानंतर लगेचच तो माघारी परतला. त्याने २७ चेंडूत ८ चौकार आणि २ षटकारांच्या मदतीने ५४ धावा केल्या. कर्णधार श्रेयस अय्यरदेखील स्वस्तात बाद झाला. त्याने केवळ ४ धावा केल्या. शिखर धवन तुफानी खेळी करून बाद झाल्यानंतर ऋषभ पंतने जबाबदारीने खेळ करत २६ चेंडूत अर्धशतक ठोकले. अत्यंत संयमी खेळी करणारा पृथ्वी शॉ झेलबाद झाला आणि दिल्लीला तिसरा धक्का बसला. शॉ ने ३९ चेंडूत ४२ धावा केल्या. अखेर ऋषभ पंतने नाबाद ७८ धावांची खेळी करत दिल्लीला विजय मिळवून दिला. त्याआधी दिल्लीचा कर्णधार अजिंक्य रहाणे याने नाणेफेक जिंकून प्रथम गोलंदाजी स्वीकारली आणि राजस्थानला प्रथम फलंदाजीस आमंत्रण दिले. अजिंक्य रहाणे याने धावेसाठी नकार दिला असतानाही सलामीवीर संजू सॅमसन धाव घेण्यासाठी पुढे आला. त्यामुळे रबाडाने त्याला धावबाद केले. सॅमसनला एकही चेंडू न खेळता माघारी परतावे लागले. संजू सॅमसन सुरुवातीलाच माघारी परतल्यानंतर कर्णधार स्मिथच्या साथीने अजिंक्य रहाणेने डाव सावरला. या दोघांनी केलेल्या फटकेबाजीच्या बळावर राजस्थानने सहाव्या षटकात पन्नाशी गाठली. अतिशय संयमी फलंदाजीसाठी ओळखल्या जाणाऱ्या अजिंक्य रहाणेने या सामन्यात मात्र तडाखेबाज सुरुवात केली. पॉवर-प्ले मधील फटकेबाजीच्या जोरावर त्याने केवळ ३२ चेंडूत आपले अर्धशतक साजरे केले. राजस्थानचा कर्णधार स्टीव्ह स्मिथ याने ३१ चेंडूत दमदार अर्धशतक ठोकले. पण पुढच्याच चेंडूवर तो झेलबाद झाला आणि दिल्लीला अखेर दिलासा मिळाला. रहाणे - स्मिथ जोडीने शतकी (१३०) भागीदारी केली. यात स्मिथने ८ चौकार लगावले. पाठोपाठ अष्टपैलू बेन स्टोक्स स्वस्तात झेलबाद झाला आणि राजस्थानला तिसरा धक्का बसला. त्याने ८ धावा केल्या. पण सलामीवीर अजिंक्य रहाणेने एक बाजू लावून धरत तुफान फटकेबाजी केली. त्याने ५८ चेंडूत आपले शतक पूर्ण केले. रहाणेने शतक पूर्ण केल्यानंतर लगेचच टर्नर झेलबाद झाला. त्याने पहिल्या चेंडूवर झेल दिला. स्टुअर्ट बिन्नीही लवकर बाद झाला. त्याने १९ धावा केल्या. पण राहणे शेवटपर्यंत नाबाद राहिला. त्याने ६३ चेंडूत १०५ धावा केल्या. यात ११ चौकार आणि ३ षटकारांचा समावेश होता.