मुंबई इंडियन्सचा स्फोटक फलंदाज कायरन पोलार्डच्या वादळापुढे चेन्नई सुपर किंग्जचे गोलंदाज अपयशी ठरले आणि मुंबईने आयपीएलमधील चेन्नईविरुद्धचे सर्वात मोठे लक्ष्य गाठले. पोलार्डने ३४ चेंडूत नाबाद ८७ धावा फटकावत चेन्नईच्या तोंडचा विजयाचा घास हिरावून घेतला. शेवटच्या षटकात १६ धावांची गरज असताना पोलार्डने चेन्नईच्या लुंगी एनगिडीला २ चौकार आणि एक षटकार खेचत सामना आपल्या बाजूने फिरवला. चेन्नईने मुंबईसमोर विजयासाठी २१९ धावांचे आव्हान ठेवले होते. पण, पोलार्डमुळे मुंबईने चेन्नईवर ४ गडी राखून विजय नोंदवला. त्यालाच सामनावीर पुरस्काराने गौरवण्यात आले.

 

मुंबईचा डाव

क्विंटन डी कॉक आणि रोहित शर्मा यांनी मुंबईच्या डावाची सुरुवात केली. पहिल्या ६ षटकांच्या पॉवरप्लेमध्ये मुंबईने दमदार फलंदाजी केली. यात रोहित आणि क्विंटनने या ६ षटकात बिनबाद ५८ धावा केल्या. पॉवरप्लेनंतर चेन्नईचा मुंबईकर गोलंदाज शार्दुल ठाकूरने रोहित शर्माला झेलबाद करत मुंबई इंडियन्सला पहिला धक्का दिला. रोहितने ३५ धावा केल्या. रोहित-क्विंटनने पहिल्या गड्यासाठी ७१ धावांची भागीदारी रचली. रोहितनंतर मैदानात आलेला सूर्यकुमार यादव स्वस्तात बाद झाला. रवींद्र जडेजाने त्याला वैयक्तिक ३ धावांवर बाद केले. सूर्यकुमार माघारी परतल्यानंतर धोनीने मोईन अलीच्या हाती चेंडू सोपवला. त्याने धोनीचा विश्वास सार्थ ठरवत चेन्नईला यश मिळवून दिले. अलीने स्थिरावलेल्या क्विंटन डी कॉकचा स्वत: च्याच गोलंदाजीवर झेल टिपला. डी कॉकने ३८ धावांचे योगदान दिले. १० षटकात मुंबईने ३ बाद ८१ धावा फलकावर लावल्या.

त्यानंतर कायरन पोलार्ड मैदानात आला. त्याने कोणताही दबाव न घेता कृणाल पंड्यासोबत भागीदारी रचली. पोलार्डने १५व्या षटकात शार्दुल ठाकूरला चौकार ठोकत १७ चेंडूत अर्धशतक साकारले. यंदाच्या आयपीएलमधील हे वेगवान अर्धशतक ठरले. १५ षटकात मुंबईने ३ बाद १५३ धावा फलकावर लावल्या. १७व्या षटकात सॅम करनने कृणाल पंड्याला पायचित पकडत ही भागीदारी मोडली. कृणालने ३२ धावा केल्या. कृणाल बाद झाल्यानंतर हार्दिक मैदानात आला. २ षटकात मुंबईला विजयासाठी ३१ धावांची गरज असताना त्याने दोन षटकार ठोकले. पण, त्यानंतर तो बाद झाला. शेवटच्या षटकात १६ धावांची गरज असताना पोलार्डने चेन्नईच्या लुंगी एनगिडीवर हल्ला चढवत आव्हान पूर्ण केले. पोलार्डने आपल्या ८७ धावांच्या खेळीत ६ चौकार आणि ८ षटकार ठोकले.

चेन्नईचा डाव

नाणेफेक जिंकलेल्या मुंबईने प्रथम चेन्नईला फलंदाजीचे आमंत्रण दिले. फाफ डु प्लेसिस, मोईन अली आणि अंबाती रायुडू यांनी केलेल्या अर्धशतकी खेळींमुळे चेन्नईने २० षटकात ४ बाद २१८ धावा फलकावर लावल्या. आयपीएलमध्ये चेन्नईच्या मुंबईसमोर या सर्वाधिक धावा ठरल्या. फाफ डु प्लेसिस आणि ऋतुराज गायकवाड यांनी चेन्नईच्या डावाची सुरुवात केली. मात्र, ट्रेंट बोल्टने टाकलेल्या पहिल्याच षटकात ऋतुराज माघारी परतला. मागील काही सामन्यात ऋतुराजने जबरदस्त कामगिरीचे प्रदर्शन केले होते. मात्र यावेळी त्याला फक्त ४ धावांचे योगदान देता आले. ऋतुराज स्वस्तात बाद झाल्यानंतर मैदानात आलेल्या मोईन अलीने मोर्चा संभाळला. त्याने सलावीर फाफ डु प्लेसिससोबत भागीदारी रचली. पहिल्या पॉवरप्लेमध्ये चेन्नईने १ बाद ४९ धावा फलकावर लावल्या. यंदाच्या हंगामात चांगल्या फॉर्मात असलेल्या मोईन अलीने १०व्या षटकात अर्धशतक पूर्ण केले. ३३ चेंडूत मोईनने अर्धशतक साकारले. जसप्रीत बुमराहने टाकलेल्या ११व्या षटकात डु प्लेसिसने षटकार खेचत चेन्नईचे शतक फलकावर लावले. याच षटकात डु प्लेसिस आणि अलीने आपली शतकी भागीदारी पूर्ण केली. षटकाच्या पाचव्या चेंडूवर बुमराहने मोईन अलीला माघारी धाडले. अलीने ५ चौकार आणि ५ षटकारांसह ५८ धावा केल्या. अली बाद झाल्यानंतर डु प्लेसिसने २७ चेंडूत अर्धशतक पूर्ण केले. या अर्धशतकानंतर तो पोलार्डच्या गोलंदाजीवर झेलबाद झाला. त्याने ४ चौकार आणि २ षटकारांसह ५० धावांची खेळी केली. डु प्लेसिसनंतर सुरेश रैनाही माघारी परतला. त्याला केवळ २ धावा करता आल्या. पोलार्डने मुंबईसाठी टाकलेल्या १२व्या षटकात दोन बळी घेत चेन्नईला संकटात टाकले.

रायुडू आणि जडेजाची अभेद्य भागीदारी

त्यानंतर अंबाती रायुडू आणि रवींद्र जडेजा यांनी भागीदारी रचली. जडेजाने संयमी तर, रायुडूने आक्रमक पवित्रा धारण करत मुंबईच्या वेगवान गोलंदाजांवर हल्ला चढवला. डावाच्या १७व्या षटकात रायुडू-जडेजा यांनी ३० चेंडूत अर्धशतकी भागीदारी पूर्ण केली. १७ षटकात चेन्नईने ४ बाद १७४ धावा केल्या. बुमराहने टाकलेल्या या षटकात रायुडू-जडेजा यांनी २१ धावा वसूल केल्या. आक्रमक खेळणाऱ्या रायुडूने १८व्या षटकात आपले अर्धशतक पूर्ण केले. अवघ्या २० चेंडूत रायुडूने अर्धशतक साकारले. यंदाच्या हंगामातील हे दुसरे वेगवान अर्धशतक ठरले. धवल कुलकर्णीने टाकलेल्या शेवटच्या षटकात चेन्नईला १४ धावा घेता आल्या. २० षटकात चेन्नईने ४ बाद २१८ धावा केल्या. रायुडूने २७ चेंडूत ७ षटकार आणि ४ चौकारांसह नाबाद ७२ धावांची खेळी केली. तर, जडेजा २२ धावांवर नाबाद राहिला. या दोघांनी ४९ चेंडूत १०२ धावांची भागीदारी रचली.