सैन्यदलासोबत सराव करण्याची कल्पना प्रेरणादायी असून त्यांच्याकडून संघटित राहण्याचा धडा शिकता आला, असे मत भारतीय फुटबॉलपटू जेजे लाल्पेखलुआ आणि जॅकीचंद सिंग यांनी सोमवारी व्यक्त केले. ‘‘ही संकल्पना आमच्यासाठी नवीन होती. जवानांकडून होणाऱ्या त्यागामुळे आम्हाला प्रेरणा मिळाली,’’ असे मत जॅकीचंद याने व्यक्त केले, तर जेजे म्हणाला, ‘‘हा अनुभव अविश्वसनीय होता.’’
२०१८ च्या विश्वचषक स्पध्रेच्या पात्रता फेरीसाठी भारतीय संघ कसून सराव करत आहे आणि त्याचाच भाग म्हणून संघाने रविवारी बंगळुरू येथे सैन्यदलासोबत सराव केला. पात्रता फेरीत भारतीय संघ ११ जून रोजी ओमान संघाशी सामना करणार आहे.