गतविजेत्या किदम्बी श्रीकांत आणि एच. एस. प्रणॉय यांनी सय्यद मोदी ग्रां. प्रि. गोल्ड बॅडमिंटन स्पध्रेत विजयी सलामी दिली. श्रीकांतने भारताच्याच सारंग लखानीचे आव्हान १५-२१, २१-७, २१-१४ असे परतवून लावले. पुढील फेरीत त्याला मलेशियाच्या झुल्हेल्मी झुल्कीफलीचा सामना करावा लागेल. गेल्या वर्षी स्विस खुली स्पर्धा जिंकणाऱ्या प्रणॉयनेही एनव्हीएस विजेथाचा २१-११, २१-९ असा सहज पराभव केला, तर बी. साई प्रणीथनेही आदित्य जोशीवर २१-१४, २१-९ अशी मात केली. चायनीज तैपेई स्पध्रेतील विजेत्या सौरभ वर्माने राहुल यादव चित्ताबोईनावर २१-११, २१-१७ असा विजय मिळवला. कार्तिक जिंदलने दुखापतीमुळे माघार घेतल्यामुळे आठव्या मानांकित समीर वर्माला विजयी घोषित करण्यात आले.
