टेनिसपटू लिएण्डर पेसला डेव्हिस चषक स्पर्धेत दुहेरीतील सर्वाधिक विजय मिळवण्याचा विश्वविक्रम खुणावत आहे. जागतिक संघाच्या प्ले-ऑफमध्ये धडक मारण्याच्या निर्धाराने भारताला शुक्रवारपासून चीनविरुद्ध झुंज द्यावी लागणार आहे. ४४ वर्षीय पेसच्या खात्यावर डेव्हिस चषक दुहेरीतील ४२ विजय जमा आहेत. इटलीच्या निकोला पित्रांगेलीनेही इतकेच विजय मिळवले आहेत. त्यामुळे रोहन बोपण्णासह खेळणाऱ्या पेसने आणख एक सामना जिंकल्यास तो डेव्हिस चषकातील सर्वात यशस्वी दुहेरी खेळाडू म्हणून ओळखला जाईल. याआधी पुण्यात फेब्रुवारी २०१७मध्ये न्यूझीलंडविरुद्ध पेसला हा विश्वविक्रम करण्याची संधी होती. मात्र त्या सामन्यात पराभव झाल्याने ही संधी हुकली.
