खेळण्याची, जिंकण्याची जिद्द काय चमत्कार घडवू शकते याचे जिवंत उदाहरण म्हणजे लिएण्डर पेस. गेली अनेक वर्षे दुहेरी प्रकारात भारताचे यशस्वी नेतृत्व करणाऱ्या लिएण्डर पेसने गुरुवारी शिरपेचात आणखी एक मानाचा तुरा खोवला. पेसने चेक प्रजासत्ताकचा साथीदार राडेक स्टेपानेकच्या साथीने खेळताना अमेरिकेच्या दिग्गज ब्रायन बंधूंवर मात केली. वर्षांतील चारही ग्रँडस्लॅम स्पर्धाची जेतेपदे नावावर करण्याची अनोखी संधी ब्रायन बंधूंकडे होती. सर्व प्रकारच्या कोर्ट्सवर प्रभुत्व गाजवणाऱ्या ब्रायन बंधूंना त्यांच्याच घरच्या मैदानात रोखणे खडतर आव्हान होते, मात्र पेसने ही किमया करून दाखवली आहे. चौथ्या मानांकित पेस-स्टेपानेक जोडीने अव्वल मानांकित आणि जेतेपदासाठी प्रबळ दावेदार असणाऱ्या ब्रायन बंधूंवर ३-६, ६-३, ६-४ अशी मात केली.
