२०१८ नंतर क्लबला सोडचिठ्ठी देणार असल्याची चर्चा लिओनेल मेस्सी आणि बार्सिलोना हे समीकरण चाहत्यांच्या मनात घट्ट आहे, परंतु हे १३ वर्षांचे ऋणानुबंध व्यावसायिक समीकरणांमुळे दुरावणार असल्याची चर्चा आहे. २०१८ नंतर बार्सिलोना क्लबसोबत नवा करार करण्यास मेस्सीने नकार दिल्याचा दावा स्पेनमधील वृत्तपत्रांनी केला आहे. पाच वेळा बॅलॉन डी’ओर पुरस्कार पटकावणाऱ्या मेस्सीचा बार्सिलोनाशी असलेला करार दोन वर्षांनंतर संपुष्टात येत आहे. ‘कोपा अमेरिका’ फुटबॉल स्पध्रेत सलग जेतेपदाने हुलकावणी दिल्यामुळे हताश झालेल्या मेस्सीने जुलै महिन्यात आपला हा निर्णय कुटुंबीयांना कळवला असल्याचा दावा या वृत्तपत्राने केला आहे. या बातमीमुळे बार्सिलोना क्लबमध्ये चिंतेचे वातावरण निर्माण झाले आहे.
