भारत आणि इंग्लंड यांच्यात विशाखापट्टणम येथे सुरू असलेल्या दुसऱया कसोटीत भारतीय संघाने पहिल्या दिवसाच्या अखेरीस ४ बाद ३१७ धावा केल्या. विराटने कर्णधारी खेळी करून नाबाद १५१ धावा केल्या, तर पुजाराने आपला दमदार फॉर्म कायम राखत शतकी खेळी साकारली. विराट आणि पुजाराच्या २२६ धावांच्या भागीदारीच्या जोरावर भारतीय संघाला दिवसाच्या अखेरीस ३०० धावांचा टप्पा ओलांडता आला. सामन्याचा नाणेफेक जिंकून फलंदाजी स्विकारलेल्या भारतीय संघाची सुरूवात निराशाजनक झाली होती. संघाची सलामी जोडी स्वस्तात बाद झाली. गौतम गंभीरऐवजी संघात स्थान देण्यात आलेला लोकेश राहुल सामन्याच्या दुसऱयाच षटकात शून्यावर बाद झाला. चांगल्या फॉर्मात असलेला मुरली विजय इंग्लंडच्या जेम्स अँडरसनच्या बाऊन्सवर झेलबाद झाला. विजयने २० धावा केल्या. पहिले दोन फलंदाज स्वस्तात माघारी परतल्यानंतर विराट कोहली आणि चेतेश्वर पुजारा यांनी संघाच्या धावसंख्येला आकार दिला. उपहारापर्यंत भारत २ बाद ९२ धावा अशा स्थितीत होता. दुसऱया सत्रात कोहली आणि पुजारा यांनी इंग्लंडच्या गोलंदाजांना पुनरागमनाची संधी न देता मैदानात जम बसवला. तिसऱया सत्रात पुजाराने रशीदला खणखणीत षटकार ठोकून आपले शतक साजरे केले, तर विराट कोहलीने १५६ चेंडूत शतक ठोकून आंतरराष्ट्रीय कसोटी कारकिर्दीतील आपले १४ वे शतक पूर्ण केले. पुजारा आणि कोहली यांनी तिसऱया विकेटसाठी २२६ धावांची भागीदारी केली. पुजारा ११९ धावांवर जेम्स अँडरसनच्या गोलंदाजीवर यष्टीरक्षक बेअरस्टोकरवी झेलबाद होऊन माघारली परतला. पुजारा तंबूत दाखल झाल्यानंतर रहाणने संयमी सुरूवात केली, पण आजच्या दिवसाचा खेळ संपण्यासाठी केवळ चार षटकांचा खेळ शिल्लक असताना रहाणेने विकेट टाकली. जेम्स अँडरसनला तिसरी विकेट मिळाली. रहाणे २३ धावांवर झेलबाद झाला. पहिल्या दिवसाचा खेळ संपला तेव्हा कोहली नाबाद १५१ धावांवर खेळत आहे. इंग्लंडकडून कोणत्याही फिरकीपटूला यश आलेले पाहायला मिळाले नाही. वेगवान गोलंदाज अँडरसनने तीन विकेट्स मिळवल्या, तर स्टुअर्ट ब्रॉडला एक विकेट मिळाली. Cricket Score of India vs England- दिवसभरातील अपडेट्स
