न्यूझीलंडविरुद्ध अखेरच्या टी-20 सामन्यात महेंद्रसिंह धोनीने स्वतःच्या नावावर एका अनोख्या विक्रमाची नोंद केली आहे. भारताकडून 300 टी-20 सामने खेळणारा धोनी पहिला खेळाडू ठरला आहे. हॅमिल्टनच्या मैदानात खेळवण्यात आलेला तिसरा सामना हा धोनीच्या कारकिर्दीतला 300 वा सामना ठरला आहे.

भारताकडून आंतरराष्ट्रीय टी-20 क्रिकेट, आयपीएल आणि झारखंड कडून खेळताना धोनीने आपल्या कारकिर्दीत 300 सामन्यांचा टप्पा पार केला आहे.

दरम्यान अखेरच्या टी-20 सामन्यात भारतीय गोलंदाजांनी पुन्हा एकदा निराशा केली. भारताच्या सर्व गोलंदाजांचा समाचार घेत न्यूझीलंडने 212 धावांपर्यंत मजल मारली. या सामन्यातही धोनीने यष्टींमागे आपली चमक दाखवली. धोनीने एक यष्टीचीत आणि एक झेल असे दोन बळी आपल्या खात्यात जमा केले.