कुमार-कुमारी राज्य अजिंक्यपद निवड चाचणी कबड्डी स्पर्धेत मुंबई शहरने दुहेरी मुकुट पटकावला. मुंबईच्या कुमारी संघाचे हे सलग दुसरे जेतेपद आहे. कुमारी गटाच्या अंतिम लढतीत मुंबई शहरने पुण्यावर २०-१७ अशी ३ गुणांनी मात केली. सोनाली शिंगटे आणि तेजस्विनी पोटे यांच्या चतुरस्र खेळाच्या जोरावर मुंबईने मध्यंतराला १४-९ अशी आघाडी घेतली होती. मध्यंतरानंतर पुण्याने आपला खेळ उंचावला आणि आगेकूच करण्याचा प्रयत्न केला मात्र तो अपुराच ठरला. मुंबई शहर संघाला चंदन सखाराम पांडे चषकाने गौरवण्यात आले. कुमार गटाच्या अंतिम लढतीत मुंबई शहरने रायगडचा २०-९ असा धुव्वा उडवला. मध्यंतराला मुंबई शहरकडे ७-५ अशी आघाडी होती. मयूर शिवतरकर आणि दुर्वेश पाटील यांनी मुंबईकडून शानदार खेळ केला. मुंबई शहरला नारायण नागू पाटील चषकाने सन्मानित करण्यात आले.
