कुडूस, वाडा येथे सुरू असलेल्या ४०व्या कुमार/ कुमारी राज्य अजिंक्यपद निवड चाचणी कबड्डी स्पर्धेत कुमारी गटात मुंबई उपनगर, नाशिक संघांनी उपांत्य फेरीत आगेकूच केली. कुमार गटात नंदुरबार, रायगड यांनी उपांत्य फेरी गाठली. कुमारी गटाच्या लढतीत उपनगरने उस्मानाबादचा ६०-२० असा धुव्वा उडवला. उपनगरतर्फे सायली जाधवने ७ चढायांत ९ गुण पटकावले.नाशिकने सिंधुदुर्गवर १७-९ अशी मात केली. कुमार गटात नंदुरबारने बीडचे आव्हान १६-१३ असे संपुष्टात आणले. नंदुरबारच्या विजयात आकाश इवले चमकला. रायगडने नांदेडचा २६-१७ असा पराभव केला. भरत मालुसरे रायगडच्या विजयाचा शिल्पकार ठरला.
