अझलन हॉकी चषक स्पध्रेत भारतीय संघाने निक्कीन थिमय्या याच्या हॅट्ट्रिकच्या बळावर विश्वविजेत्या ऑस्ट्रेलियावर ४-२ असा सनसनाटी विजय मिळवला. भारताने या विजयाबरोबरच तिसऱ्या क्रमांकासाठी होणाऱ्या लढतीत स्थान मिळविले. व्ही. आर. रघुनाथ याने पहिल्याच मिनिटाला भारताचे खाते उघडून कांगारूंना धोक्याचा इशारा दिला. थिमय्या याने २३व्या, ३२व्या व ६०व्या मिनिटाला गोल करीत संघास महत्त्वपूर्ण विजय मिळवून दिला. ऑस्ट्रेलियाकडून डॅनियल बिएल (१४ वे मिनिट) व मॅट गोहदेस (५३वे मिनिट) यांनी प्रत्येकी एक गोल केला. साखळी गटातील भारताचा हा शेवटचा सामना होता. त्यांनी पाच सामन्यांमध्ये सात गुणांची कमाई केली.
