प्रो-कबड्डीचे पहिले ६ हंगाम तेलगू टायटन्स संघाचं प्रतिनिधीत्व केल्यानंतर, 'पोस्टर बॉय' या नावाने ओळखला जाणारा राहुल चौधरी पुन्हा एकदा चमकला आहे. मुंबईत पाटणा पायरेट्सविरुद्ध सामन्यात राहुलने ऐतिहासीक कामगिरीची नोंद केली आहे. प्रो-कबड्डीच्या इतिहासात ९०० गुण मिळवणारा राहुल पहिलाच खेळाडू ठरला आहे. पाटण्याविरुद्ध सामन्यात १४ चढायांमध्ये राहुलने ५ गुण कमावत ९०० गुणांचा टप्पा गाठला. मात्र या सामन्यात राहुल आपल्या संघाला विजय मिळवून देऊ शकला नाही. पाटणा पायरेट्सने अखेरच्या सेकंदात बाजी मारत २४-२३ अशा एका गुणाच्या फरकाने सामना जिंकला. या ९०० गुणांपैकी ८४६ गुण हे राहुल चौधरीने चढाईमध्ये मिळवले आहेत. चढाईत सर्वाधिक गुण मिळवणाऱ्या खेळाडूंच्या यादीत राहुल चौधरी दुसऱ्या स्थानावर आहे. प्रो-कबड्डीच्या इतिहासात सर्वाधिक गुण मिळवणार खेळाडू - राहुल चौधरी - (तामिळ थलायवाज) : १०३ सामने ९०० गुण प्रदीप नरवाल - (पाटणा पायरेट्स) : ८८ सामने ८८३ गुण दीपक हुडा - (जयपूर पिंक पँथर्स) : १०५ सामने ८०२ गुण अजय ठाकूर - (तामिळ थलायवाज) : १०५ सामने ७६५ गुण रोहित कुमार - (बंगळुरु बुल्स) : ७५ सामने ६२० गुण
