टीम इंडियाचा अष्टपैलू खेळाडू रविंद्र जाडेजा हा येत्या १७ एप्रिल रोजी रिवासोबत विवाहबंधनात अडकणार आहे. या लग्न सोहळ्यामध्ये टीम इंडियाच्या प्लेयर्ससोबत काही परदेशी प्लेयर्सही सहभागी होणार आहेत. लग्नाच्या एक दिवसपूर्वी म्हणजेच १६ एप्रिलला जड्डू टीम इंडियातील त्याच्या सहका-यांसोबत पार्टीदेखील करणार असल्याचे कळते. मात्र, या लग्नाची पत्रिका टीम इंडियाचा कॅप्टन महेंद्रसिंग धोनी आणि सुरेश रैना यांना रविंद्र जाडेजा देणार नसल्याची माहिती समोर आली आहे. रविंद्र जाडेजा याने एका वाहिनीला दिलेल्या मुलाखतीत म्हटले की, धोनी आणि रैना यांना मी अद्याप लग्नपत्रिका पाठवलेली नाही आणि पाठवणारही नाही. याचे कारण जाडेजाने सांगितले की, हे दोघेही माझे खूप जवळचे मित्र आहेत आणि आपल्या इतक्या जवळच्या मित्रांना लग्न पत्रिका पाठविण्याची मला गरज वाटत नाही. त्यामुळे केवळ औपचारिकता म्हणून मी त्यांना फोन करणार आहे. येत्या १७ एप्रिलला जड्डू हा रिवा सोलंकीसोबत विवाहबद्ध होईल. तीन दिवस चालणा-या या सोहळ्याचे आयोजन अगदी खासगी पद्धतीने करण्यात येणार आहे.
