माद्रिद : ख्रिस्तियानो रोनाल्डोने पुन्हा एकदा अखेरच्या क्षणी गोल करत रेयाल माद्रिदचा पराभव टाळला. ला लिगा फुटबॉलमध्ये बुधवारी अ‍ॅथलेटिक बिलबाओने बलाढय़ रेयाल माद्रिदला त्यांच्याच घरच्या मैदानावर झुंजवले. ८७व्या मिनिटाला रोनाल्डोने टाचेच्या साहाय्याने केलेल्या गोलमुळे रेयालने ही लढत १-१ अशी बरोबरीत सोडवली.

संपूर्ण सामन्यात आक्रमक खेळ करूनही रेयालला गोल करण्यात यश प्राप्त होत नव्हते. बिलबाओचा गोलरक्षक केपाने रेयालचे आक्रमण अचूकपणे थोपवले. पहिल्या सत्रात रेयालकडून जवळपास १२ गोलप्रयत्न झाले. मात्र बिलबाओने १४व्या मिनिटाला इनॅकी विलियम्सच्या गोलच्या जोरावर १-० अशी आघाडी घेतली. दुसऱ्या सत्रात रेयालने आक्रमणाची धार अधिक तीव्र केली, परंतु त्याचा फार फायदा झाला नाही. अखेरीस ८७व्या मिनिटाला ल्युका मॉड्रीकच्या पासवर रोनाल्डोने उजव्या पायाच्या टाचेने चेंडूला दिशा दिली आणि तो सहज गोलजाळीत विसावला.