ब्राझीलचा अव्वल खेळाडू नेयमारला झालेल्या दुखापतीमुळे संपूर्ण फुटबॉल विश्व हेलावले आहे. अर्जेटिनाचे प्रशिक्षक अलेजांड्रो सबेला यांनीही याबाबत चिंता प्रकट केली असून नेयमारची दुखापत ही विश्वचषकासाठी दुर्दैवी असल्याचे मत त्यांनी व्यक्त केले आहे. ‘‘ज्यांचे फुटबॉलवर नितांत प्रेम आहे आणि जे फुटबॉल जाणतात त्यांच्यासाठी नेयमारची दुखापत ही वाईट बातमी आहे,’’ असे सबेला यांनी सांगितले. ते पुढे म्हणाले की, ‘‘नेयमारची दुखापत ही विश्वचषकासाठी दुर्दैवी आहे, यापेक्षा जास्त किंवा कमी काहीही म्हणता येणार नाही. विश्वचषक उंचावणे हे प्रत्येकाचे स्वप्न असते आणि त्या दुखापतीमुळे महत्त्वाच्या सामन्यांना मुकावे लागणे, याला फक्त दुर्दैवच म्हणू शकतो.’’
