अनपेक्षित निकालांना दूर ठेवत नोव्हाक जोकोविच व सेरेना विल्यम्स या अव्वल मानांकित खेळाडूंबरोबरच इंग्लंडच्या अँडी मरेने अमेरिकन खुल्या टेनिस स्पर्धेची उपांत्यपूर्व फेरी गाठली आहे. जपानच्या केई निशिकोरी याने सव्वाचार तासांच्या झुंजीनंतर पाचव्या मानांकित मिलोस राओनिक याच्यावर रोमहर्षक विजय नोंदविला.
जागतिक क्रमवारीतील अग्रमानांकित जोकोविच याने जर्मनीच्या फिलीप कोहेलश्रेबर याच्यावर ६-१, ७-५, ६-४ अशी मात केली व सलग आठव्यांदा या स्पर्धेच्या उपांत्यपूर्व फेरीत स्थान मिळविले. निशिकोरी याने उत्कंठापूर्ण लढतीत कॅनडाच्या २३ वर्षीय राओनिकला ४-६, ७-६ (७-४), ६-७ (६-८), ७-५, ६-४ असे हरविले. आठव्या मानांकित मरेने फ्रान्सच्या जो विल्फ्रेड त्सोंगाला ७-५, ७-५, ६-४ असे पराभूत करीत उपांत्यपूर्व फेरी गाठली. तृतीय मानांकित स्टॅनिस्लास वॉवरिन्क या स्वित्र्झलडच्या खेळाडूने स्पेनच्या टॉमी रॉब्रेडो याचा ७-५, ४-६, ७-६ (९-७), ६-२ असा पराभव केला.
धक्कादायक निकालांची लाट थोपवत सेरेना हिने इस्तोनियाच्या काया कानेपी हिचे आव्हान ६-३, ६-३ असे सहज संपुष्टात आणले. ३२ वर्षीय सेरेनापुढे इटलीच्या फ्लेविया पेनेट्टाचे आव्हान असणार आहे. पेनेट्टाने ऑस्ट्रेलियाच्या कॅसी डेलियाक्वावर ७-५, ६-२ अशी मात केली. १६व्या मानांकित व्हिक्टोरिया अझारेन्काने सर्बियाच्या अ‍ॅलेक्झांड्रा क्रुनिक हिला ४-६, ६-४, ६-४ असे हरविले. पहिला सेट गमावल्यानंतर सव्‍‌र्हिस व परतीचे फटके यावर नियंत्रण ठेवत अझारेन्का हिने विजयश्री खेचून आणली. सातवी मानांकित एवगेनी बुचार्ड हिला अनपेक्षित पराभवाला सामोरे जावे लागले. रशियाच्या एकतेरिना माकारोवा हिने तिच्यावर ७-६ (७-२), ६-४ अशी मात केली. माकारोवाला १७वे मानांकन आहे.

सानियाची आगेकूच; पेसचे आव्हान संपुष्टात
भारताच्या सानिया मिर्झाने ब्राझीलच्या ब्रुनो सोरेसच्या साथीने मिश्र दुहेरीची उपांत्य फेरी गाठली. या अग्रमानांकित जोडीने रोहन बोपण्णा (भारत) व कॅटरिना श्रेबोत्निक (स्लोवाकिया) यांचा ७-५, २-६, १०-५ असा पराभव केला. सानियाने कारा ब्लेक (झिम्बाब्वे) हिच्यासोबत महिलांच्या दुहेरीची उपांत्यपूर्व फेरी निश्चित केली. या जोडीने क्लारा कौकालोवा (चेक प्रजासत्ताक) व येलेना यान्कोविच (सर्बिया) यांचा ६-३, ६-२ असा दणदणीत पराभव केला.
भारताच्या लिएण्डर पेस याला मात्र दोन्ही गटांत पराभव स्वीकारावा लागला. पेस व राडेक स्टेपानेक यांना स्पेनच्या मार्सेल गोन्झालेस व मार्क लोपेझ यांनी ६-२, ४-६, ६-१ असे हरविले. पेस व कारा ब्लेक यांना मिश्र दुहेरीत अबिगेल स्पीअर्स व सँतियागो गोन्झालेस यांच्याकडून ४-६, ६-४, ८-१० असा पराभव स्वीकारावा लागला. कुमारांच्या एकेरीत भारताच्या सुमित नागपालने नॉर्वेच्या व्हिक्टर दुरासोविकचा ६-३, ६-४ असा पराभव केला.