अव्वल फुटबॉलपटू ख्रिस्तियानो रोनाल्डोने केलेल्या गोलमुळे युव्हेंट्सने सेरी-ए फुटबॉल स्पर्धेत टोरिनोला ४-१ फरकाने नमवले. याबरोबरच विक्रमी सलग १०व्या सेरी-ए विजेतेपदाच्या दिशेने युव्हेंटसची प्रभावी कामगिरी सुरू राहिली. रोनाल्डोचा या स्पर्धेच्या हंगामातील २५वा गोल ठरला. युव्हेंट्सकडूनचा त्याचा हा ४६ वा गोल आहे. युव्हेंट्सकडून फ्री-कीकवर प्रथमच गोल करण्यात रोनाल्डोला यश आले. युव्हेंट्सचे ३० सामन्यांतून ७५ गुण झाले आहेत. दुसऱ्या स्थानी असलेल्या लॅझियोला मिलानकडून ०-३ पराभव पत्करावा लागल्याने युव्हेंट्सला सात गुणांची आघाडी मिळवता आली. युव्हेंटसचा गोलरक्षक गियानलुगी बफॉनचा हा सेरी-ए फुटबॉल स्पर्धेतील विक्रमी ६४८वा सामना होता. ४२ वर्षीय बफॉनने एसी मिलानचा महान माजी खेळाडू पावलो माल्डिनीचा सेरी-एमधील सर्वाधिक सामने खेळण्याचा विक्रम मोडला.
