बांगलादेशचा अष्टपैलू खेळाडू शाकिब अल हसनला मैदानात केलेलं कृत्य चांगलंच महाग पडलं आहे. ढाका प्रीमिअर लीगच्या एका सामन्यादरम्यान त्याने स्टम्पवर लाथ मारली होती. तसेच पंचावर धावून गेला होता. या कृत्यामुळे त्याच्यावर ढाका प्रीमिअर लीगमधील चार सामने खेळण्यावर बंदी घालण्यात आली आहे. ढाका मेट्रोपोलिस क्रिकेट समितीने ही कारवाई केली आहे. यापूर्वी शाकिबने त्याच्या कृत्याबद्दल माफी मागितली होती.

बांग्लादेशात सुरु असलेल्या ढाका प्रिमियर लिग टी-२० स्पर्धेदरम्यान हा प्रकार घडला. मोहमद्दन स्पोर्टिंग क्लब आणि अबाहानी लिमिटेड या दोन संघादरम्यान सामना सुरु होता. मोहमद्दन स्पोर्टिंगचा खेळाडू शाकिब हसनने अबाहानी लिमिटेडच्या मुश्फिकुर रहीम याच्याविरोधात एलबीडब्लूचे अपील केलं. त्यावर अंपायरनी नॉट आऊटचा निर्णय घेतला. अंपायरच्या या निर्णयावर शाकिबने त्यांच्याशी वाद घातला आणि स्टंपवर लाथ मारली.

या सामन्याचा आणखी एका व्हिडीओमध्ये अंपायरने नॉट आऊटचा निर्णय दिल्यानंतर शाकिबला संताप अनावर झाल्याचे दिसत आहे. नॉट आऊटचा निर्णय दिल्यानंतर शाकिबने अंपायरशी वाद घातला. त्यानंतर रागाच्या भरात शाकिबने तिनही स्टंप्स काढून टाकल्या आणि त्या पीचवर फेकल्या. शाकिबच्या कृतीमुळे आता सोशल मीडियामध्ये त्यावर टीका केली जात आहे. कायमस्वरुपी बंदी आणावी अशी मागणीदेखील क्रिकेट चाहत्यांनी बांग्लादेश क्रिकेट बोर्डकडे आणि आयसीसीकडे केली आहे.

शाकिबची पत्नी उम्मी अहमद शिशिरने या घटनेवर आपली प्रतिक्रिया व्यक्त केली. उम्मी अहमद शिशिरने फेसबुकवर एक पोस्ट टाकून पती शाकिबचा बचाव केला आहे. ”माझ्या नवऱ्याला असे कृत्य करण्यास भाग पाडले गेले आहे. शाकिबने मैदानावर जे काही केले, त्यामागे एखादे षडयंत्र रचले गेले असावे.”, अशी माहिती शाकिबच्या पत्नीने फेसबुकवर दिली आहे.