मुंबईकर तन्वी लाड, पी. सी. तुलसीसह नऊ भारतीय बॅडमिंटनपटूंनी मलेशिया ग्रां. प्रि. बॅडमिंटन स्पर्धेत विजयी सलामी दिली. मात्र अनुभवी अरुंधती पनतावणे आणि सायली गोखले यांना सलामीच्या लढतीतच पराभवाला सामोरे जावे लागले. तन्वीने इंडोनेशियाच्या दिनार द्याह ऑयुस्टिनवर २१-१९, २१-१७ असा विजय मिळवला. तुलसीने तैपेईच्या यु पो पैचा १६-२१, २१-१६, २१-१७ अशी मात केली. जपानच्या युकी फुकशिमाने सायली गोखलेवर २१-१३, २१-१३ असा विजय मिळवला. जपानच्याच अयुमी मिनेने चुरशीच्या लढतीत अरुंधती पनतावणेला १२-२१, २३-२१, २१-१९ असे नमवले. पुरुषांमध्ये आठव्या मानांकित सौरभ वर्माने हाँगकाँगच्या यान किट चानवर २१-१२, २१-१७ असा विजय मिळवला. अनुभवी अनुप श्रीधरने इंडोनेशियाच्या धर्मा अल्री गुनावर २१-११, २१-१६ असा विजय मिळवला. माजी राष्ट्रीय विजेता चेतन आनंदने इंडोनेशियाच्या कासेर अकबरचा २१-११, २१-१४ असा पराभव केला. सहाव्या मानांकित आरएमव्ही गुरुसाईदत्तने भारताच्याच गौरव वेंकटचा २१-७, २१-८ असा धुव्वा उडवला.
