दिनेश चंडिमलचे अर्धशतक आणि गोलंदाजांच्या भेदक कामगिरीच्या बळावर श्रीलंकेने संयुक्त अरब अमिरातीविरुद्ध १५ धावांनी विजय मिळवला. श्रीलंकेने प्रथम फलंदाजी करताना १२९ धावांची मजल मारली. चंडिमलने ७ चौकार व एका षटकारासह ५० धावा केल्या. दिलशानने २७ धावा केल्या. अमिरातीतर्फे अमजद जावेदने ३ बळी घेतले. मग अमिरातीची ४ बाद १६ अशी अवस्था झाली. या धक्क्यातून ते सावरलेच नाही. निर्धारित षटकात त्यांनी ११५ धावा केल्या.स्वप्निल पाटीलने सर्वाधिक ३७ धावा केल्या. श्रीलंकेतर्फे लसिथ मलिंगाने ४ तर नुवान कुलसेकराने ३ बळी घेतले. अर्धशतकी खेळी साकारणाऱ्या चंडिमलला सामनावीर पुरस्काराने गौरवण्यात आले.
