मुंबई बंदर, बँक ऑफ बडोदा, न्यू इंडिया इन्शुरन्स, सेंट्रल बँक हे महाराष्ट्र कामगार कल्याण मंडळ आयोजित राज्यस्तरीय कबड्डी स्पर्धेत शहरी व्यावसायिक पुरुषांत उपांत्य फेरीत धडकले. महिलांमध्ये बँक ऑफ बडोदा, ठाणे मनपा, महाराष्ट्र राज्य विद्युत वितरण आणि एमरॉल्ड इन्फ्रास्ट्रक्चर यांनी उपांत्य फेरी गाठली. शहरी व्यावसायिक पुरुषांच्या उपांत्यपूर्व सामन्यात गतविजेत्या मुंबई बंदरने ठाणे मनपाचा ३६-२९ असा पराभव केला. सलील पाटील, शुभम कुंभार यांचा खेळ मुंबई बंदरच्या विजयात महत्त्वपूर्ण ठरला. न्यू इंडियाने महाराष्ट्र बँकेचे आव्हान ३९-२३ असे संपवले. कुलदीप माईणकर, सुनील जाधव, राहुल शिरोडकर न्यू इंडियाकडून चांगले खेळले. गतउपविजेत्या बँक ऑफ बडोदाने रिझव्‍‌र्ह बँकेचा प्रतिकार ४२-१८ असा मोडून काढला. सिद्धार्थ पिंगे, नितीन देशमुख, जितेश पाटील विजयात चमकले. सेंट्रल बँकेने विद्युत वितरणचा प्रतिकार ३८-३४ असा मोडून काढला. ऋषिकेश गावडे, अमित जाधव, महालु गरुड यांचा खेळ सेंट्रल बॅँकेच्या विजयात मोलाचा ठरला. या विभागात मुंबई बंदर विरुद्ध न्यू इंडिया आणि बँक ऑफ बडोदा विरुद्ध सेंट्रल बँक अशा उपांत्य लढती होतील. महिला गटाच्या उपांत्यपूर्व लढतीत ठाणे मनपाने अमरहिंदचा ३७-१० असा पाडाव केला. मनपाकडून तेजस्वी पाटेकर, प्राजक्ता पुजारी, तेजस्विनी पोटे यांनी चमकदार कामगिरी केली. एमरॉल्डने नाशिकच्या रचना क्रीडा मंडळाचा ३९-०६ असा धुव्वा उडवला. सिद्धी चाळके, हर्षदा सोनावणे यांच्या खेळाला या विजयाचे श्रेय जाते.
