टेनिसपटू सानिया मिर्झाने तिच्या बाळाचा पहिला फोटो ट्विटरवर ट्विट केला आहे. टेनिसपटू सानिया मिर्झा आणि क्रिकेटपटू शोएब मलिक यांना ३० ऑक्टोबरला पुत्ररत्न झाले. सोशल मीडियाच्या माध्यमातून सानियाने पहिल्यांदाच मुलाचा फोटो शेअर केला आहे. शोएब मलिकने मुलगा झाल्याची बातमी सोशल मीडियावर पोस्ट केली होती. त्यानंतर काही दिवसांपूर्वी सानियाने मुलाला घेतलेला एक फोटो पोस्ट केला होता. ज्यामध्ये त्याचा चेहरा दिसत नव्हता. पण या मुलाचे नाव इजहान आहे हे त्याच्या ब्लँकेटवरून समजले होते. आता मुलाचा चेहरा दाखवणारा एक फोटो सानिया मिर्झाने पोस्ट केला आहे.

सोशल मीडियावर सानियाने फोटो ट्विट करताच त्याला २६ हजाराच्यावर लाइक्स मिळाले आणि सुमारे १ हजार पेक्षा जास्त क्रीडाप्रेमींनी हा फोटो रिट्विट केला आहे.  अनेकांनी सानियाला शुभेच्छा दिल्या. २०१० मध्ये सानिया मिर्झा आणि शोएब मलिक यांचा विवाह झाला. त्यांना तब्बल आठ वर्षांनी मूल झाले. बाळाचे नाव या दोघांनीही इजहान मिर्झा मलिक असे ठेवले आहे.