बॅडमिंटन हा खेळ आता नव्या रूपात चाहत्यांना पाहायला मिळणार आहे. या खेळातील उत्सुकता शिगेला पोहोचवण्यासाठी जागतिक बॅडमिंटन महासंघ (बीडब्ल्यूएफ) नियमावलीत बदल करण्याची शक्यता आहे. इंडोनेशिया आणि मालदीव या दोन संघटनांनी केलेल्या शिफारशीनुसार आता नियमपुस्तिकेत बदल केले जाण्याची शक्यता आहे. बॅडमिंटनचे सामने २१ गुणांचे खेळवले जातात. तीनपैकी दोन गेम जिंकणारा सामन्यात विजयी ठरत असे. पण आता या खेळातील रंगत वाढवण्यासाठी आणि दूरचित्रवाणीवर प्रेक्षकांना खिळवून ठेवण्यासाठी ११ गुणांचे पाच गेम खेळवण्यात येणार असल्याचा प्रस्ताव विचाराधीन आहे. २२ मे रोजी होणाऱ्या वार्षिक सर्वसाधारण सभेदरम्यान हा नियम अमलात येण्याची शक्यता आहे. ‘‘बॅडमिंटन हा खेळ अधिक रंगतदार बनवण्यासाठी गुणांकन पद्धतीत बदल करण्याचे आधीपासूनच मनात होते. टोक्यो ऑलिम्पिक क्रीडा स्पर्धेनंतर हे बदल केले जाण्याचे प्रस्तावित आहे. या बदलाची हीच योग्य वेळ आहे,’’ अशी आशा ‘बीडब्ल्यूएफ’चे अध्यक्ष आणि १९९६च्या ऑलिम्पिकचे विजेते पाऊल-एरिक होयेर यांनी सांगितले.