वाल्दीमिर क्लित्सच्कोचा अकरा वर्षांचा अपराजित राहण्याचा विक्रम मोडीत काढताना ब्रिटनच्या टायसन फ्युरीने विश्व हेवीवेट गटाचे अजिंक्यपद आपल्या नावावर केले. २७ वर्षीय फ्युरीने डसेल्डरेफ येथे झालेल्या सामन्यात ११५-११२, ११५-११२ व ११६-१११ अशी बाजी मारली. डब्लूबीए, आयबीएफ, आयबीओ आणि डब्लूबीओ अशी जेतेपदे नावावर असलेल्या युक्रेनच्या क्लित्सच्कोचा हा २००४ नंतरचा पहिला पराभव आहे. ‘‘देवाचे आभार मानू इच्छितो. त्याच्या आशीर्वादामुळे हा विजय मला प्राप्त करता आला. मी या क्षणासाठी कठोर परिश्रम घेतले आणि माझे स्वप्न सत्यात उतरले,’’ असे मत फ्युरीने व्यक्त केले.
