माजी आशियाई क्रीडा विजेता विकास कृष्णन (७५ किलो) व गौरव सोलंकी (५२ किलो) या भारतीय खेळाडूंनी आंतरराष्ट्रीय बॉक्सिंग स्पर्धेतील उपांत्य फेरीत स्थान मिळवून आपले पदक निश्चित केले आहे. विकासने कझाकिस्तानच्या तुर्सीन्बे कुलाख्मेतवर सहज विजय मिळवला. हाताच्या दुखापतीमुळे अनेक दिवस सरावापासून वंचित असलेल्या विकासचा हा विजय निश्चितच अपेक्षा उंचावणारा आहे. गौरवने किर्गिझस्तानच्या अझात उसेनालिएवचे आव्हान संपुष्टात आणले. भारताच्या अमित पांघल (४९ किलो) व महम्मद हुसामुद्दीन (५६ किलो) यांनी यापूर्वीच उपांत्य फेरीकडे वाटचाल केली आहे. महिलांमध्ये एम.सी.मेरी कोम, एल.सरिता देवी, सीमा पुनिया, सविता बुरा, मीनाकुमारी देवी व भाग्यबती कचरी यांनीही उपांत्य फेरीत स्थान मिळवत किमान कांस्यपदक निश्चित केले आहे.
