आयपीएलच्या दहाव्या मोसमात सनरायझर्स हैदराबाद संघाचा कर्णधार जबरदस्त डेव्हिड वॉर्नर फॉर्मात दिसतो आहे. डेव्हिड वॉर्नरने कोलकात्याविरुद्धच्या सामन्यात झंझावाती शतक झळकावले. वॉर्नरच्या बॅटचा तडाखा इतका जबरदस्त होता की संघाने उभारलेल्या आव्हानाच्या निम्म्याहून अधिक धावा वॉर्नरने केल्या होत्या. वॉर्नरच्या घणाघाती फलंदाजीमुळे हैदराबादने कोलकात्यावर ४८ धावांनी सफाईदार विजय मिळवला. वॉर्नरच्या फलंदाजीची सोशल मीडियावर जोरदार चर्चा आहे. सोशल मीडियावर अनेकांनी वॉर्नरला 'बाहुबली' म्हटले आहे. कोलकात्याविरुद्धच्या सामन्यात डेव्हिड वॉर्नरने शतकी खेळी साकारली. कोलकात्याच्या गोलंदाजांची धुलाई करत वॉर्नरने हैदराबादला मोठी धावसंख्या रचून दिली. ५९ चेंडूंमध्ये १० चौकार आणि ८ षटकारांची आतषबाजी करत वॉर्नरने १२६ धावांची खेळी केली. वॉर्नरच्या शतकामुळे हैदराबादने ३ बादर २०९ धावा केल्या. यानंतर प्रत्युत्तरादाखल कोलकात्याला २० षटकांमध्ये ७ बाद १६१ धावाच करता आल्या. आयपीएलच्या १० व्या हंगामात आतापर्यंत सर्वाधिक धावा डेव्हिड वॉर्नरच्या खात्यात जमा आहेत. वॉर्नरने ९ सामन्यांमध्ये ४५९ धावा केल्या आहेत. यामध्ये एका शतकासह तीन अर्धशतकांचा समावेश आहे. वॉर्नरनंतर कोलकात्याचा कर्णधार गौतम गंभीरच्या नावावर ३८७ धावा आहेत, तर कोलकात्याच्याच रॉबिन उथप्पाने ३८४ धावा केल्या आहेत. वॉर्नरने यंदाच्या आयपीएलमध्ये ४३ चौकारांसह २२ षटकारांची बरसात केली आहे. यंदाच्या आयपीएलमध्ये सर्वाधिक षटकारांच्या यादीत वॉर्नर पहिल्या क्रमांकावर आहे.
