News Flash

‘या’ संघाचा फक्त २८ धावांत उडाला खुर्दा, त्यातही १३ धावा अवांतर

तब्बल ३९० धावांनी पराभव

सौदी संघाविरोधात खेळणाऱ्या चीनचा २८ धावांत खुर्दा उडाला.

भारतात आयपीएलच्या सामन्यांमध्ये धावांचे डोंगर रचले जात असताना दुसरीकडे क्रिकेटविश्वात दमदार आगमनाचे चीनच्या स्वप्नांचे इमले कोसळले आहेत. आयसीसी वर्ल्ड लीगच्या पात्रता फेरीतील सामन्यांत सौदी संघाच्या विरोधात खेळणाऱ्या चीन संघाचा अक्षरशः धुव्वा उडाला. चीनचा आख्खा संघ अवघ्या २८ धावांत आटोपला. ५० षटकांच्या या सामन्यात चीनला सौदीविरोधात तब्बल ३९० धावांनी पराभूत व्हावं लागलं.

थायलंडमध्ये आयसीसी वर्ल्ड लीग सुरू आहे. या स्पर्धेत यजमान थायलंडसह भूतान, बहारिन, कुवैत, कतार यांच्यासह सौदी आणि चीनच्या संघांनी सहभाग घेतला आहे. थायलंडमधील चियांग माईतील जिमखाना क्लबमध्ये चीन आणि सौदी या दोन संघांत पात्रता फेरीतील सामना झाला. प्रथम फलंदाजी करताना सौदीच्या संघाने ५० षटकांत ४१८ धावांचा डोंगर उभा केला. हे आव्हान घेऊन चीनचा संघ मैदानावर उतरला. मात्र, चीनच्या एकेक फलंदाजाने सौदीच्या गोलंदाजांच्या माऱ्यासमोर अक्षरशः नांगी टाकली. १२.४ षटकांत अवघ्या २८ धावांमध्ये संघाचा डाव आटोपला. चीनचा ३९० धावांनी पराभव झाला. चीनच्या संघातील ७ फलंदाजांना भोपळाही फोडता आला नाही. इतर तीन फलंदाजांनी अनुक्रमे ३, ३ आणि नाबाद ६ धावा केल्या. विशेष म्हणजे या डावात चीनला १३ धावा अवांतर मिळाल्या होत्या.

याआधी २००७ मध्ये बारबादोसविरोधात खेळताना वेस्टइंडिजच्या १९ वर्षांखालील संघाचा डाव ५० षटकांमध्ये अवघ्या १८ धावांमध्येच आटोपला होता. आंतरराष्ट्रीय एकदिवसीय क्रिकेटमध्ये २००४ मध्ये श्रीलंकेच्या संघाने झिम्बॉम्बेच्या संघाचा ३५ धावांमध्ये खुर्दा उडवला होता.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on April 23, 2017 1:41 pm

Web Title: wcl where china have been bowled out for 28 in response to saudi arabia 418 runs
Next Stories
1 मुंबईच अव्वल!
2 सुपरमॅन!
3 धोनी पुण्यासाठी तारणहार!