India vs West Indies 3rd ODI Live Updates : भारताविरुद्धच्या तिसऱ्या एकदिवसीय सामन्यात विंडीजने ४३ धावांनी विजय मिळवला. तुलनेने सोप्या वाटणाऱ्या २८४ धावांचा पाठलाग करताना भारताचा डाव २४० धावांत आटोपला. होपच्या शतकामुळे विंडीजने २८३ धावांपर्यंत मजल मारली होती. पण विराट कोहलीने शतक ठोकूनही भारताला हे आव्हान पूर्ण करता आले नाही. या विजयाबरोबरच विंडीजने मालिका १-१ अशी बरोबरीत आणली असून आपल्या आशा जिवंत ठेवल्या आहेत. या आधी विंडीजने ९ बाद २८३ धावा केल्या. शाय होपच्या ९५ धावा आणि नर्स, हेटमायर व होल्डर यांची छोटी पण उपयुक्त खेळी याच्या बळावर विंडीजने ही मजल मारली. भारताने नाणेफेक जिंकून प्रथम विंडीजला फलंदाजीसाठी आमंत्रित केले होते. फटकेबाजीने सुरुवात करणाऱ्या विंडीजचे दोनही सलामीवीर स्वस्तात बाद झाले. हेमराजने १५ तर कायरन पॉवेलने २१ धावा केल्या. त्यानंतर आलेल्या शाय होपने गेल्या सामन्यातील खेळी पुढे सुरु ठेवत ९५ धावा ठोकल्या. यात ६ चौकार आणि ३ षटकारांचा समावेश होता. पण त्याला हेटमायर (३७) आणि होल्डर (३२) वगळता कोणाची अपेक्षित साथ मिळू शकली नाही. शेवटच्या षटकांत अॅश्ले नर्स (४०) आणि केमार रोच (१५* ) यांनी केलेल्या फटकेबाजीमुळे विंडीजला २८३ धावांपर्यंत मजल मारता आली. या आव्हानाचा पाठलाग करताना भारताची सुरुवात असमाधानकारक झाली. रोहित शर्मा ८ धावांवर तंबूत परतला. शिखर धवन (३५), अंबाती रायडू (२२) आणि ऋषभ पंत (२४) यांना चांगली सुरुवात मिळाली पण त्यांना त्याचे मोठ्या धावसंख्येत रूपांतर करता आले नाही. मधल्या फळीत महेंद्रसिंग धोनीने केवळ ७ धावा केल्या तर तळाच्या फलंदाजांपैकी भुवनेश्वर कुमारने १०, कुलदीप यादवने नाबाद १५, चहल आणि अहमदने ३-३ तर बुमराहने ० धावा केल्या. कर्णधार कोहलीने शतक झळकावत भारताला विजयाच्या नजीक नेले. पण सॅम्युअल्सने त्याला त्रिफळाचित करत भारताच्या आशा संपवल्या. विराटने ११९ चेंडूत १०७ धावा केल्या. त्यात त्याने १० चौकार आणि १ षटकार लगावला.