मुंबई महापौर चषक कबड्डी स्पर्धेच्या पुरुष व्यावसायिक गटात पश्चिम रेल्वे आणि मुंबई पोलिसांनी विजयी सलामी दिली. महिपालच्या उत्कृष्ट चढाया आणि साईनाथ काळसेकरच्या अचूक पकडींच्या बळावर पश्चिम रेल्वेने गुरुकुल, रत्नागिरीचा २७-२२ असा पराभव केला. बँक ऑफ इंडियाने मध्य रेल्वेवर १४-१२ असा निसटता विजय मिळवला. विजय जाधव, सूरज बनसोडे यांनी सुरेख खेळ केला. मुंबई पोलिसांनी यजमान मुंबई महानगरपालिकेवर १९-११ असा विजय मिळवला. अभिमन्यू चव्हाणच्या यशस्वी चढाया आणि विशाल तळेकरच्या उत्कृष्ट पकडींमुळे मुंबई पोलिसांनी हा विजय साकारला. महिला गटाच्या लढतींमध्ये शिवशक्ती महिला संघाने उपनगरच्या सावित्रीबाई फुले संघाला ४२-१७ असे नमवले. ऋतुजा देऊलकरच्या उत्कृष्ट चढाया आणि सुवर्णा बारटक्केच्या यशस्वी पकडींनी शिवशक्तीने हा विजय मिळवला. मुंबई पोलीस संघाने अमरहिंदवर १०-७ असा विजय मिळवला. ठाण्याच्या शिवछत्रपतीने विश्वशांतीचा २९-७ असा, तर डॉ. शिरोडकरने उपनगरच्या महात्मा गांधी संघाचा २६-२० असा पराभव केला. अमर हिंदने संघर्षवर २४-२३ असा विजय मिळवला.