Wimbledon 2018 Women’s Single Final : ११व्या मानांकित जर्मनीच्या अँजेलिक कर्बर हिने आज विम्बल्डन स्पर्धेच्या महिला एकेरीमध्ये अंतिम सामन्यात सेरेना विल्यम्सला ६-३, ६-३ अशा सरळ सेटमध्ये पराभूत केले. कर्बरचे हे पहिलवहिले विम्बल्डन विजेतेपद तर तिसरे ग्रँडस्लॅम विजेतेपद ठरले. कन्यारत्न झाल्यानंतर सेरेनाने या स्पर्धेतून टेनिसमध्ये 'कमबॅक' केले होते. त्यामुळे सेरेनाच्या या स्पर्धेकडून फार अपेक्षा होत्या. त्यानुसार सेरेनाने या स्पर्धेची अंतिम फेरी गाठली. पण अंतिम सामन्यात तिच्याकडून लौकिकाला साजेसा खेळ झाला नाही. कर्बरने सामन्यावर सुरुवातीपासून वर्चस्व राखले होते. कर्बरला सेरेनाकडून कडवी झुंज देण्यात येईल अशी अपेक्षा चाहत्यांना होती. मात्र हा सामना पूर्णपणे एकतर्फी झाला. या कामगिरीने मिळवून दिले स्टेफी ग्राफ यांच्या पंक्तीत स्थान हा विजय मिळवून अँजेलिक कर्बर हिने दिग्गज माजी टेनिसपटू स्टेफी ग्राफ यांच्या पंक्तीत स्थान मिळवले. १९९६ सालानंतर जर्मनीकडून महिला एकेरीचे विम्बल्डन विजेतेपद पटकावणारी ती पहिली महिला ठरली. या आधी स्टेफी ग्राफ यांनी जर्मनीला हा मान मिळवून दिला होता. Following in great footsteps @AngeliqueKerber beats Serena Williams 6-3, 6-3 to become the first German to win a #Wimbledon singles title since Steffi Graf in 1996 #TakeOnHistory pic.twitter.com/UwmpYbXZyR — Wimbledon (@Wimbledon) July 14, 2018 या विजयासह कर्बरने आपल्या कारकिर्दीतील पहिलेवहिले विम्बल्डन विजेतेपद पटकावले. हे तिच्या कारकिर्दीतील तिसरे ग्रँडस्लॅम विजेतेपद ठरले. याआधी कर्बरने ऑस्ट्रेलियन ओपन आणि अमेरिकन ओपन स्पर्धेचे प्रत्येकी १ विजेतेपद पटकावले होते. तिने हि दोन्ही विजेतेपदे २०१६ साली पटकावण्याची किमया केली होती.