सरफराज अहमदच्या नेतृत्वाखाली पाकिस्तानच्या संघाला विश्वचषकाच्या पहिल्याच सामन्यात लाजिरवाण्या पराभवला सामोरं जावं लागलं. पहिल्यांदा फलंदाजी करताना पाकिस्तानचा संघ अवघ्या १०५ धावांमध्ये माघारी परतला. त्यानंतर विंडिजने विजयासाठी दिलेलं १०६ धावांचं आव्हान ३ गड्यांच्या मोबदल्यात पूर्ण करत ७ गडींनी विजय नोंदवला. ख्रिस गेलने अर्धशतकी खेळी करत संघाच्या विजयात मोलाचा वाटा उचलला. अवश्य वाचा - Cricket World Cup 2019 : युनिव्हर्सल बॉस ख्रिस गेल ठरला षटकारांचा बादशहा दरम्यान या सामन्यात पाकिस्तानच्या संघाच्या नावावर काही नकोशा विक्रमांची नोंद झाली आहे. १०५ ही पाकिस्तानची विश्वचषक इतिहासातली दुसरी निचांकी धावसंख्या ठरली आहे. याआधी १९९२ साली इंग्लंडविरुद्ध सामन्यात पाकिस्तानचा संघ ७४ धावांवर गारद झाला होता. ३६.२ षटकं राखून विंडीजने हा सामना जिंकला. चेंडू बाकी राखण्याच्या निकषांमध्ये पाकिस्तानचा हा सर्वात लाजिरवणा पराभव ठरला आहे. याआधी १९९९ साली ऑस्ट्रेलियाने पाकिस्तानवर १७९ चेंडू राखून मात केली होती. १०५ ही विश्वचषक इतिहासातली २१ वी निचांकी धावसंख्या ठरली आहे. २१.४ षटकात पाकिस्तानचा डाव आटोपला, विश्वचषक इतिहासात झटपट बाद होण्याची पाकची ही पहिली वेळ ठरली आहे. १९९२ साली ७४ धावांवर बाद झालेला असतानाही पाकचा संघ ४०.२ षटकं खेळला होता. याचसोबत २१.४ ही पाकिस्तानची वन-डे इतिहासातली झटपट बाद होण्याची दुसरी वेळ ठरली आहे. याआधी १९९३ साली पाकिस्तानचा संघ विंडिजविरुद्ध १९.५ षटकांमध्ये माघारी परतला होता. ३० जानेवारीपासून पाकिस्तानचा संघ वन-डे क्रिकेटमध्ये एकही सामना जिंकू शकला नाही. पाकच्या पराभवाची ही सर्वात मोठी शृखंला ठरली आहे. नॉटिंगहॅमच्या मैदानात पाकिस्तानने नोंदवलेली १०५ ही दुसरी निचांकी धावसंख्या ठरली आहे. अवश्य वाचा - Cricket World Cup 2019 : गेलच्या झंजावातापुढे पाकिस्तान बेजार, ७ गडी राखून विंडिज विजयी
