पीटीआय, सोची (रशिया) ‘फिडे’ विश्वचषक बुद्धिबळ स्पर्धेच्या पुरुषांच्या उपांत्यपूर्व सामन्यात भारताच्या विदित गुजराथीचे आव्हान संपुष्टात आले. यान-क्रिस्टॉफ डुडाविरुद्धच्या दुसऱ्या डावात विदित पराभूत झाला. भारतीय बुद्धिबळ क्रमवारीत तिसऱ्या क्रमांकावर असलेल्या २६ वर्षीय विदितने पोलंडच्या डुडाविरुद्धच्या दुसऱ्या डावात काळ्या मोहऱ्यांनिशी खेळताना ५० चालींनंतर पराभव मान्य केला. बुधवारी या दोघांमध्ये झालेला पहिला डाव बरोबरीत सुटला होता. गुजराथीने प्रथमच विश्वचषक स्पर्धेची उपांत्यपूर्व फेरी गाठली होती. डुडाचा उपांत्य फेरीत जागतिक क्रमवारीत अग्रस्थानावर असलेल्या मॅग्नस कार्लसनशी सामना होईल. कार्लसनने रशियाच्या सर्जी कार्याकिनला २-० असे नमवले.
