भारताचा युवा टेनिसपटू युकी भांबरीला ऑस्ट्रेलियन खुल्या टेनिस स्पर्धेच्या पात्रता फेरीतच पराभवाला सामोरे जावे लागले. इटलीच्या २८व्या मानांकित पोटिटो स्टारेसने युकीवर ६-३, १-६, ६-२ अशी मात केली. पहिला गेम गमावल्यानंतर युकीने झुंजार खेळ करत दुसरा सेट जिंकून बरोबरी केली. तिसऱ्या आणि निर्णायक सेटमध्ये स्टारेसने आपला खेळ उंचावत बाजी मारली. या पराभवासह ऑस्ट्रेलियन खुल्या टेनिस स्पर्धेच्या एकेरी प्रकारात खेळण्याचे युकीचे स्वप्न भंगले असले तरी दुहेरी प्रकारात मात्र तो खेळणार आहे. न्यूझीलंडच्या मायकेल व्हीनसच्या साथीने तो खेळणार आहे.
