News Flash

झहीर परतला!

भारताचा अनुभवी वेगवान गोलंदाज झहीर खानने जवळपास एक वर्षांच्या कालावधीनंतर भारताच्या कसोटी संघात पुनरागमन केले आहे.

| November 26, 2013 12:06 pm

* दक्षिण आफ्रिका दौऱ्यासाठीही गंभीरकडे दुर्लक्ष
* अंबाती रायुडूला कसोटीसह एकदिवसीय संघातही स्थान
भारताचा अनुभवी वेगवान गोलंदाज झहीर खानने जवळपास एक वर्षांच्या कालावधीनंतर भारताच्या कसोटी संघात पुनरागमन केले आहे. मात्र पुढील महिन्यात सुरू होणाऱ्या दक्षिण आफ्रिका दौऱ्यासाठी सलामीवीर गौतम गंभीरकडे निवड समितीने दुर्लक्ष केले आहे. मधल्या फळीतील फलंदाज अंबाती रायुडू याला भारताच्या कसोटी आणि एकदिवसीय संघात स्थान देण्यात आले आहे.
गेल्या वर्षी मायदेशात इंग्लंडविरुद्ध झालेल्या मालिकेत अखेरचा कसोटी सामना खेळणाऱ्या झहीरला काही दिवसांपूर्वी बीसीसीआयच्या करारबद्ध खेळाडूंच्या यादीतून डच्चू देण्यात आला होती. तरीही तंदुरुस्तीशी लढा देणाऱ्या ३५ वर्षीय झहीरने भारताच्या १७ जणांच्या कसोटी संघात स्थान मिळवले आहे. मात्र त्याला एकदिवसीय संघात जागा मिळाली नाही. झहीरने या मोसमात रणजी स्पर्धेत चांगली कामगिरी करत आतापर्यंत १३ बळी मिळवले आहेत. वीरेंद्र सेहवाग आणि हरभजन सिंग या भारताच्या अनुभवी खेळाडूंना दोन्ही संघात स्थान मिळवता आले नाही. रणजी स्पर्धेत काही दिवसांपूर्वी शतक झळकावूनही गंभीरसाठी भारतीय संघाचे दरवाजे बंदच राहिले. मुंबईकर अजिंक्य रहाणेला कसोटी आणि एकदिवसीय संघात कायम ठेवण्यात आले आहे.
कसोटी संघात महेंद्रसिंग धोनीसाठी राखीव यष्टीरक्षम म्हणून वृद्धिमन साहाची निवड करण्यात आली आहे. खांद्याच्या दुखापतीमुळे वेस्ट इंडिजविरुद्धच्या मालिकेला मुकलेला फिरकीपटू रवींद्र जडेजा संघात परतला आहे. आर. अश्विन आणि प्रग्यान ओझा यांच्यानंतर तो कसोटी संघातील तिसरा फिरकीपटू असणार आहे.
एकदिवसीय संघात इशांत शर्माचा समावेश करण्यात आला, याचेच सर्वाना आश्चर्य वाटले. ऑस्ट्रेलियाविरुद्धच्या एकदिवसीय मालिकेत तीन सामन्यांत १८९ धावा देणारा इशांत एका षटकांत तब्बल ३० धावा देऊन मोहालीतील सामन्यात पराभवास कारणीभूत ठरला होता. वेस्ट इंडिजविरुद्धच्या कसोटी मालिकेत तो भारतीय संघाचा भाग होता. पण मोहम्मद शामीच्या सुरेख कामगिरीमुळे त्याला अंतिम संघात स्थान मिळाले नाही. जयदेव उनाडकट आणि विनय कुमार यांच्या जागी एकदिवसीय संघात इशांत आणि उमेश यादव यांना संधी देण्यात आली आहे.  

कसोटी संघ : महेंद्रसिंग धोनी (कर्णधार), मुरली विजय, शिखर धवन, चेतेश्वर पुजारा, विराट कोहली, रोहित शर्मा, अजिंक्य रहाणे, अंबाती रायुडू, वृद्धिमन साहा, झहीर खान, भुवनेश्वर कुमार, मोहम्मद शामी, उमेश यादव, इशांत शर्मा, आर. अश्विन, रवींद्र जडेजा, प्रग्यान ओझा.
एकदिवसीय संघ : महेंद्रसिंग धोनी (कर्णधार), शिखर धवन, सुरेश रैना, युवराज सिंग, विराट कोहली, रोहित शर्मा, अजिंक्य रहाणे, आर. अश्विन, भुवनेश्वर कुमार, मोहम्मद शामी, उमेश यादव, अंबाती रायुडू, रवींद्र जडेजा, इशांत शर्मा, मोहित शर्मा, अमित मिश्रा.

झहीरकडून शिकायला मिळेल -उमेश यादव
नवी दिल्ली : भारतीय क्रिकेट संघात पुन्हा स्थान मिळाल्यामुळे मी आनंदी असून हे पुनरागमन यशस्वी करेन. भारतीय संघात स्थान मिळाल्याच्या आनंदापेक्षाही या संघात मला झहीर खानसह खेळण्याची संधी मिळण्याचा अधिक आनंद होत आहे. झहीर माझ्यासाठी आदर्श आहे. अनेक युवा गोलंदाजांना झहीरने अनेक वेळा मार्गदर्शन केले आहे. त्याच्यासारखा रिव्हर्स स्वींग कोणी टाकू शकत नाही, असे दक्षिण आफ्रिका दौऱ्यासाठी भारतीय संघात निवड झालेल्या उमेश यादवने सांगितले. ‘‘कसोटीसाठी संघात स्थान मिळेल अशी मला खात्री होती मात्र एकदिवसीय मालिकेसाठीही माझी निवड झाल्याचे आश्चर्य मला वाटले, असेही उमेश यादवने सांगितले.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on November 26, 2013 12:06 pm

Web Title: zaheer khan back for south africa tests gautam gambhir misses out
Next Stories
1 कोल्हापूरला सांघिक विजेतेपद
2 केनिया, इथिओपियाच्या धावपटूंमध्येच चुरस
3 आनंद ‘एनआयआयटी’च्या ब्रॅण्ड अ‍ॅम्बेसेडरपदी कायम
Just Now!
X