Usman Khawaja: “अजून ८ हवेत,मग…”, उस्मान ख्वाजा तिसऱ्यांदा झाला बाबा; खास पोस्ट करत म्हणाला…

उस्मान ख्वाजाने तिसऱ्यांदा वडील झाल्याच्या आनंदाची बातमी देणारी एक पोस्ट आपल्या अधिकृत सोशल मीडिया अकाऊंटवरून शेअर केली आहे. व्हायरल होत असलेल्या फोटोमध्ये तो आपल्या पत्नी आणि ३ मुलींसह असल्याचं दिसून येत आहे. या पोस्टला कॅप्शन देत त्याने लिहिले की, “३ पैकी ३..अमीरा माया ख्वाजाचा जन्म गेल्या शुक्रवारी झाला. आम्ही खूप कृतज्ञ आहोत. आणखी एक गोंडस मुलगी. संपूर्ण टीम तयार करण्यासाठी अजून ८ हवे आहेत.”

या पोस्टवर ऑस्ट्रेलियाचा माजी सलामीवीर फलंदाज डेव्हिड वॉर्नरने मजेशीर प्रतिक्रिया दिली आहे. त्याने हसायचा ईमोजी शेअर करून अभिनंदन मित्रा.. असं लिहिलं आहे. डेव्हिड वॉर्नरला देखील ३ मुली आहेत. उस्मान ख्वाजाने ही पोस्ट शेअर केल्यानंतर अनेक दिग्गज खेळाडूंनी अभिनंदन केलं आहे. ऑस्ट्रेलियाचा माजी वेगवान गोलंदाज ब्रेट ली ने देखील कमेंट करून त्याचा शुभेच्छा दिल्या आहेत.

उस्मान ख्वाजाने ऑस्ट्रेलिया संघासाठी मोलाचं योगदान दिलं आहे. जानेवारी महिन्यात त्याने आंतरराष्ट्रीय क्रिकेटमधून निवृत्तीची घोषणा केली होती. २०१६ मध्ये त्याने रचेल मेक्कमेलनसोबत साखरपुडा केला होता. त्यानंतर २०१८ मध्ये दोघे विवाह बंधनात अडकले होते. २०२० मध्ये या दोघांच्या कुटुंबात आयशा राहीलचे आगमन झाले होते. तर त्यांच्या दुसऱ्या मुलीचं नाव आयला ख्वाजा असं आहे.