Aaryaveer Sehwag appointed Delhi Under-19 cricket team captain: भारताचा स्फोटक माजी फलंदाज वीरेंद्र सेहवागची मुलं क्रिकेटच्या मैदानावर उतरली आहेत. वडिलांच्या पावलावर पाऊल ठेवत सेहवागच्या मुलांनी भारतीय क्रिकेट संघापर्यंतच्या प्रवासाला सुरूवात केली आहे. अंडर-१९ क्रिकेट खेळत असलेल्या सेहवागचा लेक आर्यवीर सिंगवर वयाच्या १८व्या वर्षी संघाच्या नेतृत्त्वाची जबाबदारी देण्यात आली आहे.

वीरेंद्र सेहवागचा १८ वर्षांचा मुलगा, आर्यवीर सेहवाग याच्यावर पहिल्यांदाच एक मोठी जबाबदारी सोपवण्यात आली आहे. ‘विनू मंकड ट्रॉफी’साठी दिल्लीच्या १९-वर्षांखालील (Under-19) क्रिकेट संघाचा कर्णधार म्हणून त्याची नियुक्ती करण्यात आली आहे. दिल्ली अँड डिस्ट्रिक्ट क्रिकेट असोसिएशनने (DDCA) या स्पर्धेसाठी १६ सदस्यांच्या संघाची घोषणा केली असून, या स्पर्धेतील सामने ८ ऑक्टोबरपासून विशाखापट्टणम येथे सुरू होणार आहेत.

याआधी, आर्यवीरने नुकताच भारताच्या १९-वर्षांखालील (Under-19) संघासाठी आपला पहिला सामना खेळला. गेल्या महिन्यात राजकोट येथे ऑस्ट्रेलियाविरुद्ध झालेल्या एकदिवसीय मालिकेसाठी तो भारतीय संघाचा भाग होता. आपल्या पहिल्याच सामन्यात त्याने २६ चेंडूंत २८ धावा केल्या आणि पावसाचा व्यत्यय आलेल्या त्या रोमांचक सामन्यात भारताने ऑस्ट्रेलियाचा ७ धावांनी पराभव केला.

दुसऱ्या एकदिवसीय सामन्यात त्याने या मालिकेतील आपली सर्वोत्तम कामगिरी केली. आर्यवीरने समंजसपणे फलंदाजी करत ४७ धावा केल्या आणि सुरुवातीच्या टप्प्यात संघासाठी काही महत्त्वपूर्ण भागीदारींमध्ये सहभाग नोंदवला. दुर्दैवाने, तो रनआऊट झाला आणि अवघ्या तीन धावांनी त्याचं अर्धशतक हुकलं. तिसऱ्या सामन्यातही त्याला चांगली सुरुवात मिळाली होती, परंतु ३४ धावांवर तो बाद झाला. या तीन सामन्यांच्या मालिकेत त्याने एकूण १०९ धावा केल्या.

दिल्ली प्रीमियर लीगमध्ये मिळाली होती संधी

भारताच्या १९-वर्षांखालील (Under-19) संघात निवड होणं, हा आर्यवीरच्या कारकिर्दीतील एक महत्त्वाचा टप्पा होता, कारण उच्च स्तरावर खेळण्याचा त्याला यापूर्वी मर्यादित अनुभव होता. २०२६ च्या ‘दिल्ली प्रीमियर लीग’मध्ये त्याने ‘वेस्ट दिल्ली लायन्स’साठी केवळ दोन सामने खेळले आणि त्यात २४ धावा केल्या. पण, २०२४ मध्ये कनिष्ठ स्तरावर खेळताना त्याने सर्वांचं लक्ष वेधून घेतलं; त्यावेळी मेघालयाविरुद्धच्या एका सामन्यात दिल्लीसाठी खेळताना त्याने शानदार २९७ धावांची खेळी केली होती.

चांगल्या सुरुवातीचं रूपांतर मोठ्या खेळीत कसं करायचं, हे शिकण्याची गरज असल्याचं आर्यवीरला वाटतं. ऑस्ट्रेलिया मालिकेदरम्यान मिळालेल्या संधींचं मोठ्या धावसंख्येत रूपांतर करण्यात आपण अपयशी ठरलो, याची त्याने कबुली दिली. तसेच, दीर्घकाळ फलंदाजी करताना ती वेगवेगळ्या टप्प्यांमध्ये विभागून खेळण्याची रणनीती आपण या मालिकेतून शिकल्याचंही त्याने म्हटलं होतं.

विनू मांकड ट्रॉफीसाठी दिल्लीचा संपूर्ण संघ

आर्यवीर सेहवाग (कर्णधार), तन्मय चौधरी, अर्णव बुग्गी (उपकर्णधार), धन्य नाकरा, उदय चावला, गर्व कुमार, अभिराज गगन सिंह (यष्टीरक्षक), तरूण सिंह (यष्टीरक्षक), आर्यन शर्मा, ओजसदीप सिंह, किरीट कौशिक, वरूण वंजानी, रूद्र देव यादव, प्रद्युम्न सनन, पार्थ राज, शांतनु यादव