“विराट मला निवृत्ती घेण्यापासून थांबवत होता पण…”, एबी डिव्हिलियर्सचा खुलासा, IPLमधून निवृत्ती घेण्यापूर्वी काय घडलं होतं?

दक्षिण आफ्रिकेच्या या दिग्गज फलंदाजाने २०१८ मध्ये आंतरराष्ट्रीय क्रिकेटला रामराम ठोकला होता. भारत आणि ऑस्ट्रेलियाविरुद्धच्या घरच्या मालिकांमध्ये संघाला विजय मिळवून दिल्यानंतर त्याने हा निर्णय घेतला. त्यानंतर तो इंडियन प्रीमियर लीग (IPL)सह विविध फ्रँचायझी स्पर्धांमध्ये खेळत राहिला. अखेर २०२१ मध्ये त्याने सर्व प्रकारच्या क्रिकेटमधून निवृत्ती जाहीर केली.

रॉयल चॅलेंजर्स बंगळुरू (RCB)चा माजी स्टार फलंदाज एबी डिव्हिलियर्सने मोठा खुलासा करत सांगितलं की, २०२१ मध्ये फ्रँचायझी क्रिकेटमधून निवृत्ती घेण्याचा निर्णय घेतल्यानंतर विराट कोहलीने आपला निर्णय बदलण्याचा प्रयत्न केला होता. मात्र, आपण निवृत्तीचा निर्णय पक्का केला असल्याने त्याचा विचार बदलला नाही. टाईम्स ऑफ इंडिया स्पोर्ट्सच्या बॉम्बे स्पोर्ट्स एक्सचेंज पोडकास्टमध्ये बोलताना डिव्हिलियर्स म्हणाला, “होय, विराटने मला निवृत्ती घेऊ नकोस, असा सल्ला दिला होता. त्याने माझा निर्णय बदलण्याचा प्रयत्न केला.”

एबी डिव्हिलियर्सने सांगितलं की, आंतरराष्ट्रीय क्रिकेटमधून निवृत्ती घेण्याचा निर्णय त्याने अगदी योग्य वेळी घेतला होता. “आंतरराष्ट्रीय क्रिकेटमधून मला ज्या वेळी निवृत्ती घ्यायची होती, त्याच वेळी मी घेतली. आम्ही भारत आणि ऑस्ट्रेलिया संघांना त्यांच्या घरच्या मालिकांमध्ये पराभूत केलं होतं आणि मी सर्वोच्च टप्प्यावर असतानाच निरोप घेतला. कुटुंबासोबत जगभर फिरायचं, त्यांना आयपीएल, इंग्लंडमधील ब्लास्ट आणि ऑस्ट्रेलियातील बिग बॅशसारख्या स्पर्धांचा अनुभव द्यायचा, असा माझा विचार होता. जेव्हा मला वाटलं की आता योग्य वेळ आली आहे, तेव्हा २०२१ मध्ये फ्रँचायझी क्रिकेटलाही अलविदा म्हणण्याचा निर्णय घेतला,” असं तो म्हणाला.

डिव्हिलियर्सच्या मते, आयपीएलमधून निवृत्ती हा अचानक घेतलेला निर्णय नव्हता. “हा विचार माझ्या शेवटच्या हंगामभर मनात होता. अखेर एक दिवस मी विराटकडे गेलो आणि त्याला स्पष्टपणे सांगितलं, ‘आता मी थांबतोय’,” असा खुलासा त्याने केला. एबी डिव्हिलियर्सने बंगळुरूच्या एम. चिन्नास्वामी स्टेडियममध्ये खेळताना चाहत्यांकडून मिळणाऱ्या प्रचंड प्रेमासोबत येणाऱ्या दबावाबाबतही मनमोकळेपणाने भाष्य केलं. आरसीबीचे चाहते सतत आपल्या नावाचा जयघोष करत असत, मात्र त्यामागे मानसिक ताणही तितकाच मोठा होता, असं त्याने सांगितलं.

डिव्हिलियर्स म्हणाला, “अशा वातावरणात खेळणं अनेकदा थकवणारं ठरतं. हे फक्त आनंददायी क्षण नसतात; त्यामागे अनेक कठीण प्रसंगही असतात. स्वतःकडून आणि चाहत्यांकडून असलेल्या अपेक्षांचा ताण कधी-कधी इतका वाढतो की तो गुदमरून टाकणारा असतो. मोठ्या सामन्यांपूर्वी मला अनेकदा झोपही लागत नसे. संघासाठी काहीतरी विशेष करण्याचाच विचार सतत डोक्यात असायचा. त्यामुळे हा प्रवास नेहमीच सोपा नव्हता. मात्र, क्रिकेटमध्ये जे काही साध्य केलं, त्याचा मला प्रचंड अभिमान आहे.”