KKR vs SRH: अभिषेक शर्माच्या विकेटवरून पेटला वाद, वरूणने कॅच पकडला होता की नाही? तिसऱ्या पंचांकडून चूक? Video

नवव्या षटकात ब्लेसिंग मुझरबानी गोलंदाजीला आला दुसऱ्या चेंडूवर त्याने इशान किशनला झेलबाद केलं. त्यानंतर चौथ्या चेंडूवर अभिषेक शर्मादेखील माघारी परतला. डावखुऱ्या अभिषेक शर्माची तुफानी खेळी अचानक थांबली. ब्लेसिंग मुजारबानीच्या गोलंदाजीवर वरूण चक्रवर्तीने डीप स्क्वेअर लेगवर त्याचा झेल टिपला. अर्धशतकापासून अवघ्या दोन धावा दूर असताना, छोट्या चेंडूवर फटका मारण्याच्या प्रयत्नात त्याने लेग साइडकडे जोरदार पुल शॉट खेळला. तिथे वरुण चक्रवर्तीने उजवीकडे धावत जाऊन जमिनीच्या अगदी जवळ शानदार झेल टिपला.

केकेआरच्या खेळाडूंनी लगेच जल्लोष सुरू केला, मात्र अभिषेक या झेलबाबत पूर्ण खात्रीशीर नसल्याने क्रीजवरच थांबला. त्यामुळे मैदानावरील पंचांनी निर्णयासाठी तिसऱ्या पंचांकडे धाव घेतली. या निर्णयानंतर मैदानावर तीव्र प्रतिक्रिया उमटल्या. हैदराबादचे मुख्य प्रशिक्षक डॅनियल व्हेटोरी हेही पंचांसोबत चर्चा करताना दिसले आणि या निर्णयाबाबत ते स्पष्टपणे नाराज असल्याचं दिसून आलं. तिसरे पंच नितीन मेनन यांनी अनेक रीप्ले तपासले, ज्यात झूम फुटेजचाही समावेश होता आणि त्यातून वेगवेगळे निष्कर्ष समोर येत होते.

काही अँगलमध्ये चक्रवर्तीच्या बोटांचा चेंडूखाली आधार असल्याचं दिसत होतं, तर काहींमध्ये चेंडू जमिनीला लागल्याची शक्यता जाणवत होती. एका रीप्लेमध्ये चेंडू थोडासा वर उचलला गेल्यासारखा दिसत होता, ज्यामुळे तो जमिनीला लागल्याचा आभास निर्माण होत होता. मात्र अशा हालचाली स्वच्छ झेल घेतल्यानंतरही हात वर गेल्याने दिसू शकतात. ठोस पुरावा नसल्यामुळे मैदानावरील पंचांचा निर्णय कायम ठेवण्यात आला.

साधारणपणे फिल्डिंगसाठी ओळखला न जाणारा चक्रवर्ती याचा हा प्रयत्न सामन्याचा कल बदलणारा ठरला. २१ चेंडूत ४ चौकार आणि ४ षटकारांसह ४८ धावा करणारा अभिषेक नाराज दिसत मैदानाबाहेर गेला. सीमारेषा ओलांडताना त्याने आपली नाराजीही व्यक्त केली, कारण त्याच्या खेळीमुळे हैदराबाद मजबूत स्थितीत पोहोचली होती. अखेरीस हेनरिक क्लासेन व नितीश कुमार रेड्डीच्या खेळीच्या बळावर हैदराबादचा संघ २० षटकांत २२६ धावा करण्यात यशस्वी ठरला.