India vs Australia 3rd Test: भारत आणि ऑस्ट्रेलिया संघाता चार कसोटी सामन्यांची बॉर्डर गावसकर ट्रॉफी खेळली जात आहे. या मालिकेतील तिसरा सामना इंदोर येथे शुक्रवारी पार पडला. ज्यामध्ये भारतीय संघाला ऑस्ट्रेलिया संघाकडून ९ विकेट्सने पराभव पत्कारावा लागला. त्याचबरोबर ऑस्ट्रेलिया संघाने वर्ल्ड टेस्ट चॅम्पियनशीपच्या अंतिम फेरीत धडक मारली आहे. यादरम्यान एक ऑस्ट्रेलियन चाहता भारतीय क्रिकेट चाहत्यांच्या तसेच टीम इंडियाच्या जखमेवर मीठ चोळताना दिसला. सध्या एका ऑस्ट्रेलियन चाहत्याचा एक व्हिडिओ व्हायरल होत आहे. ज्यामध्ये तो टीम इंडियाची अवस्था पाहून 'पुष्पा' चित्रपटातील 'झुकेगा नही साला' हा प्रसिद्ध डायलॉग उच्चारताना दिसत आहे. एवढेच नाही तर हा चाहता पुष्पाच्या सिग्नेचर पोजची कॉपी करताना दिसला.इंदोर कसोटी सामना तिसऱ्या दिवशी लंच ब्रेकपूर्वी संपला. भारताने ऑस्ट्रेलियाला ७६ धावांचे लक्ष्य दिले होते, जे ऑस्ट्रेलियाने एक विकेट गमावूनच गाठले. इंदोरमध्ये नाणेफेक जिंकून प्रथम फलंदाजी करताना भारतीय संघ केवळ १०९ धावांवर गारद झाला होता. ऑस्ट्रेलियाने पहिल्या डावात १९७ धावा केल्या होत्या. भारताला दुसऱ्या डावातही पुनरागमन करता आले नाही. त्यानंतर संपूर्ण संघ १६३ धावांवर पॅव्हेलियनमध्ये परतला. त्यामुळे ऑस्ट्रेलियाला विजयासाठी अवघ्या ७६ धावांचे लक्ष्य मिळाले. चार कसोटी सामन्यांच्या मालिकेत भारत अजूनही २-१ ने पुढे आहे. या मालिकेतील शेवटचा सामना अहमदाबादमध्ये ९ मार्चपासून खेळवला जाणार आहे. भारताच्या अडचणी वाढणार? वर्ल्ड टेस्ट चॅम्पियनशिप २०२३ च्या अंतिम सामन्याच्या दृष्टिकोनातून भारताच्या अडचणी वाढल्या आहेत. भारतीय संघ पुढचा सामना हरला तर समीकरण अधिकच गुंतागुंतेचे होईल. कारण त्यानंतर त्यांच्या हातात काहीच राहणार नाही. कारण भारताला न्यूझीलंड आणि श्रीलंका कसोटी मालिकेच्या निकालावर अवलंबून राहावे लागेल. ज्यामध्ये भारताला प्रार्थना करावी लागेल की, न्यूझीलंडचा संघ श्रीलंकेला दोन्ही सामन्यात पराभूत करावे किंवा किमान मालिका १-० ने जिंकावी. हेही वाचा - Irani Cup 2023: यशस्वी जैस्वालने शतक झळकावत रचला इतिहास; ‘ही’ कामगिरी करणारा ठरला पहिलाच भारतीय वर्ल्ड टेस्ट चॅम्पियनशिप २०२३ फायनल जूनमध्ये होणार – वर्ल्ड टेस्ट चॅम्पियनशिप २०२३ चा अंतिम सामना इंग्लंडमध्ये होणार आहे. हा सामना लंडनमधील ओव्हल मैदानावर खेळला आहे. फायनल ७ ते ११ जून दरम्यान खेळवली जाईल, तर १२ जून हा स्पर्धेसाठी राखीव दिवस म्हणून ठेवण्यात आला आहे. २०२१ मध्ये खेळल्या गेलेल्या आयसीसी वर्ल्ड टेस्ट चॅम्पियनशिपच्या अंतिम सामन्यात भारताला दारुण पराभवाला सामोरे जावे लागले होते. न्यूझीलंड संघाने भारताचा पराभव केला होता.
