“रोहितच्या क्वालिटीबद्दल बोलायची गरजच नाही…”, अजिंक्य रहाणे रोहितच्या २०२७ वर्ल्डकपमध्ये खेळण्याबाबत नेमकं काय म्हणाला?

रहाणेने नुकतीच निवृत्ती जाहीर केली आहे. त्याची गणना भारतातील सर्वोत्तम फलंदाजांमध्ये केली जाते. त्याने मुंबईसाठी रोहितबरोबर देशांतर्गत क्रिकेट खेळलं आहे; विशेष म्हणजे, सध्याचे निवडसमितीचे प्रमुख अजित आगरकर ज्या भागातून येतात, त्याच भागातील रोहितही आहे. रहाणेने म्हटलं आहे की, विश्वचषकादरम्यान संघाला रोहितच्या अनुभवाची गरज भासेल आणि म्हणूनच त्याची निवड केली जावी.

रोहित शर्माचं एकदिवसीय क्रिकेटमधील भविष्य अजूनही चर्चेचा विषय ठरत असलं, तरी भारतीय संघाच्या योजनांमध्ये त्याचं महत्त्व कायम आहे. लॉर्ड्सवरील शानदार पुनरागमनानंतरही त्याच्या २०२७ विश्वचषकातील स्थानाबाबत चर्चा सुरूच आहेत. मात्र अजिंक्य रहाणेने स्पष्टपणे म्हटलं आहे की, रोहितसारख्या खेळाडूचं मूल्यांकन एका मालिकेवरून करता येत नाही.

इंडियन एक्सप्रेसच्या आयडिया एक्सचेंज मुलाखतीत रहाणे म्हणाला, “रोहित शर्माला स्पष्ट सांगितलं पाहिजे की तो २०२७ चा वनडे वर्ल्डकप खेळणार आहे. अनेक वर्षांतील त्याचं योगदान पाहा, जे कमालीचं आहे. विश्वचषकासारख्या स्पर्धेत अशा अनुभवी खेळाडूची गरज असते. एकेक मालिकांच्या आधारे तुम्ही निर्णय घेऊ शकत नाही, कारण तो एक मोठा खेळाडू आहे.”

रहाणे पुढे म्हणाला, “आपण त्यांना मोकळेपणाने खेळू द्यायला हवं. प्रत्येक खेळाडू कारकिर्दीत त्या टप्प्यावर पोहोचतो, पण वरिष्ठ खेळाडूंनाही कर्णधार आणि टीम मॅनेजमेंटचा पाठिंबा मिळाला की ते अधिक आत्मविश्वासाने खेळतात. त्यांना २०२७ वर्ल्ड कपपर्यंत निर्धास्तपणे खेळू द्या.”

त्याने क्रिकेटमधील ‘रिदम’चे महत्त्व अधोरेखित करत सांगितलं, “क्रिकेट हा रिदमचा खेळ आहे. तुम्ही युवा खेळाडू असो किंवा अनुभवी, लय मिळणं महत्त्वाचं असतं. रोहितच्या गुणवत्तेबद्दल बोलण्याची गरजच नाही. यावर कोणताही वाद होऊ नये. जर त्याला २०२७ वर्ल्ड कप खेळायचा असेल, तर त्याने नक्की खेळला पाहिजे.”

रोहितच्या भविष्याबाबत पुन्हा प्रश्न उपस्थित होण्यामागे त्याच्याभोवतीच्या अलीकडील चर्चांचा मोठा वाटा आहे. इंग्लंडविरुद्धची वनडे मालिका त्याची शेवटची मालिका ठरू शकते, असं वृत्त आलं होतं. मात्र लॉर्ड्सवर त्याने ११० चेंडूत १३८ धावांची तुफानी खेळी करत त्या सर्व चर्चांना जोरदार उत्तर दिलं.