आशियाई क्रीडा स्पर्धेच्या सहाव्या दिवशी भारतीय नौकानयनपटूंनी धडाकेबाज कामगिरी सुरुच ठेवली आहे. भारताच्या संघाने सांघिक प्रकारात सुवर्णपदकाची कमाई केली आहे. भारतीय संघाने ६:१७:१३ अशी आश्वासक वेळ नोंदवत आपल्या प्रतिस्पर्ध्यांना मागे टाकलं. या स्पर्धेतलं भारताचं हे पाचवं सुवर्णपदक ठरलं आहे. भारताच्या दत्तू भोकनळ, स्वर्णसिंह, ओम प्रकाश आणि सुखमित सिंह या चौकडीने भारताला नौकानयनात पहिलं सुवर्णपदक मिळवून दिलं. याआधी सकाळच्या सत्रात दुष्यंतने पुरुषांच्या लाईटवेट सिंगल स्कल्स प्रकारात कांस्यपदकाची कमाई केली. दुष्यंतने ७:१८:७६ अशी वेळ नोंदवली. या प्रकारात कोरियाच्या खेळाडूला सुवर्ण तर हाँग काँगच्या खेळाडूला रौप्यपदक मिळालं. यापाठोपाठ भारताच्या रोहित कुमार - भगवान सिंह जोडीलाही लाईटवेट डबल स्कल्स प्रकारात कांस्यपदक मिळालं. दुसरीकडे १० मी. एअर पिस्तुल प्रकारात भारताची मनू भाकेर पुन्हा एकदा शर्यतीमधून बाहेर पडली. मात्र भारताच्या हिना सिद्धुने कांस्यपदकाची कमाई करत भारताला आणखी एक पदक मिळवून दिलं. याचसोबत जलतरण, बॉक्सिंगमध्येही भारतीय खेळाडूंनी चांगली कामगिरी केली आहे. मात्र वेटलिफ्टींग प्रकारात भारताच्या राखी हलदर पदकाच्या शर्यतीतून बाहेर पडली.
